भांगरभूंय | प्रतिनिधी
मडगांव, प्रतिनिधी ः कुठ्ठाळे नुस्तेंमारी जेटीचें खाजगीकरण खंयचेच परिस्थितींत करूंक फावना. राज्य सरकारान नुस्तेकार भावां आडचो हो प्रकल्प न्हयकारचो. राज्यांतल्या जेटींच्या नूतनीकरणाचे काम हातांत घेवचें अशी मागणी काँग्रेसीच्या पदाधिकाऱ्यांनी केल्या.
दक्षीण गोंय काँग्रेस कार्यालयांत पत्रकार परिशदेंत संबोधीत करतना दक्षीण गोंयचे अध्यक्ष साविओ डिसिल्वा, ओलांसिओ सिमोईस, ऑरविन दुरांदो आनी हेरांनी कुठ्ठळेंच्या जेटीचें खाजगीकरण करपाक विरोध उक्तायला. कुठ्ठाळें पंचायतींक आनी जेटीचेर आशिल्ल्या नुस्तेकारां विस्वास घनासतना सरकारान ह्या जेटीचें खाजगीकरण करपाचें थारायलें अशें साविओ डिसिल्वा हांणी सांगलें. ही म्हायती नुस्तेमारी मंत्री नीळकंठ हळर्णकार हांणी विधानसभेंतल्या प्रस्नाक जाप दितना दिली. कुठ्ठाळी जेटी डीप सी फिशिंग अँड मार्केटिंग कोऑपरेटिव्ह सोसायटी लिमिटेड कंपनी कडेन दिल्या. हे विशीं म्हाका कांयच खबर ना अशें आमदार आंतोन वाझ हांणी सांगलें. कोणाकूच खबर नासतना खात्यान परस्पर जेटींचें खाजगीकरण केलें काय असो प्रस्न उप्रासता. नुस्तेमारी मंत्री हळर्णकार हांणी संचालक मोंतेरो आनी डीप सी फिशींगाच्या वांगड्यां सयत आनी तांच्या कुटुंबां वांगडा नॉर्वेची अभ्यास भोंवडी केली. हे विशीं कुटबण जेटी, मालीम जेटी, वास्को जेटीचेर आशिल्ल्या सोसायटींकय म्हायती दिवंक नाशिल्ली. ही अभ्यास भोंवडी सरकारी खर्च कांय खाजगी खर्चाचेर जाल्ली हें जनतेक कळपाची गरज आसा. हाचे भायर जेटीचें खाजगीकरण करतना प्रधानमंत्री मत्स्य संपदा येवजणेच्या आनी राज्य सरकाराच्या निधींतल्यान नव्या जेटीचें बांदकाम करतले. हे संबंदी प्रस्ताव केंद्र सरकाराक मान्यताये खातीर धाडला अशेंय सांगतात. कोणाकूच विस्वासांत घेनासतना कुठ्ठाळी जेटीचें खाजगीकरण फाटीं घेवचें अशी मागणी डिसिल्वा हांणी केल्या.
कुठ्ठाळें जेटींच्या नूतनीकरणाची मागणी जायतीं वर्सां प्रलंबीत आसतना सरकार नवी जेटी तयार करून ताचें खाजगीकरण करता अशें ओलांसिओ सिमोईस हांणी सांगलें. कोळसो येरादारी खातीर, व्हडल्या बोटींक सुवात मेळोवपा खातीर वा हेर कितेंय करपा खातीर हाची म्हायती नुस्तेकारांक ना. आमदारांक तांच्या मतदारसंघांत कितें घडटा हाची जाणविकाय ना, बेकायदेशीर वेवसायांक तेंको दिवपा खातीर ते आमदार जाल्यात काय कितें असो प्रस्न पडटा. सरकार जेटींचें खाजगीकरण करिनासतना सगल्या जेटींचे नूतनीकरण करपाचे काम हातांत घेवचें अशें सिमोईस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
