भांगरभूंय | प्रतिनिधी
मुख्यमंत्र्यांची घोशणा; गोवा डेरीक दिली भेट
फोंडें: मुख्यमंत्री डॉ. प्रमोद सावंत हांणी मंगळारा सकाळीं कुट्टी हांगासरल्या नव्या पशू संवर्धन तशेंच गोवा डेरीचे कचेरेक भेट दिली. ह्या वेळार मुख्यमंत्र्यांनी नवें पशू चिकित्सा म्हाविद्यालय तशेंच गोवा डेरींत नवो प्रकल्प उबारतले अशी घोशणा केली.
मुख्यमंत्री़ डॉ. प्रमोद सावंत हांणी दोनूय खात्याच्या प्रशासकी अधिकार्यां बरोबर कुट्टी हांगासरल्या पशू संवर्धन खात्याचे इमारतीक भेट दिली. उपरांत गोवा डेरीक भेट दिवन थंयच्या कामाची म्हायती करून घेतली.
ह्या वेळार पत्रकारांक अदीक म्हायती दितना मुख्यमंत्र्यांनी सांगलें, नवी प्रशासकी समितीची नेमणूक केले उपरांत गोवा डेरी फायद्यांत येता. ताका लागून दूद उत्पादकां मदीं समाधान उक्तायतात. सद्या जे पद्दतीन गोवा डेरीची स्थिती सुदारता तें पळयत जाल्यार फुडारांत गोवा डेरी प्रकल्प उबारून दूद उत्पादकांक थाकाय दिवपाचो यत्न करतले. ते खातीर गोंय सरकार केंद्र सरकाराचें सहकार्य घेतले अशें तांणी सांगलें.
कुट्टी हांगासरल्या पशू संवर्धन इमारतींत पशू चिकित्सा अभ्यासक्रमा खातीर लागपी साधन सुविधा निर्माण केल्यात. दरेक वर्सा 60 विद्यार्थी हांगा शिक्षण घेतले अशी वेवस्था केल्या. व्हेटर्नरी कावन्सीलान परवानगी दिल्यार हांगा सुसज्ज अशें पशू चिकित्सा म्हाविद्यालय सुरू करतले अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
