भांगरभूंय | प्रतिनिधी
म्हापशें, प्रतिनिधी ः खडपावाडो कुचेली- म्हापशें सरकारी जमनीचेर बांदिल्लीं बेकायदेशीर घरां मातये भरवण करपाची कारवाय सुरु केली. अतिक्रमण करून बेकायदेशीर रितीन बांदिल्लीं 36 घरां मातये भरवण करपाची कारवाय मंगळारा 12 तारखेर सकाळीं सुरू केली. मसणभुंये खातीर संपादीत केल्ल्या 30 हजार चौखण मिटर जमनीचेर बेकायदेशीर अतिक्रमण करुन बांदिल्ली घरां रितीं करपाची निमाणी नोटीस उपजिल्होधिकारी कबीर शिरगांवकार हांणी फाटल्या ४ नोव्हेंबराक जारी केल्ली.
मंगळारा सकाळीं जेसीबी वरवीं हीं घरां मातये भरवण करपाचें काम पुलीस बंदोबस्त खाला सुरु केलें. हे खातीर व्हड प्रमाणांत पुलीस बंदोबस्त आशिल्लो. ह्या वेळार उपजिल्होधिकारी कबीर शिरगांवकार हांचे सयत मामलेदार, एनजीपीडीए आनी हेर अधिकारी हाजीर आशिल्ले.
हाचे आदीं चडशा लोकांनी कारवायेची भिरांत आशिल्ल्यान घरांतल्यान सामान भायर काडिल्लें. जाल्यार सकाळीं पुलिस घडणुकेच्या सुवातेर पावले तेन्ना हेर लोकांनी घरांतल्यान सामान भायर काडपाक सुरवात केली.
म्हापशें शार पीटी शीट क्रमांक 1, चलता क्रमांक 10/3 तले 9911 चौखण मिटर. आनी पीटी शीट क्रमांक 2, चलता क्रमांक 11/1 हातूंत 20276 चौखण मिटर अशें वट्ट 30 हजार 187 चौखण मिटर कुचेली कोमुनिदादची जमीन उत्तर गोंय नियोजन उदरगत प्राधिकरणान 2017 वर्सा सगल्या धर्मीय मसणभुंये खातीर सरकारा कडल्यान संपादीत केल्ली. वयल्या पीटी शीट क्रमांकातल्या जमनीत बेकादेशीररित्या 120 ते 140 काँक्रीटाचीं घरां बेकायदेशीर रितीन बांदल्यांत. तातूंत उल्लेख केल्ल्या संपादीत सरकारी जमनीचेर अतिक्रमण केल्ल्या 36 घरांचो आस्पाव आशिल्लो.
फाटल्या 7 ऑक्टोबर 2024 दिसा सर्वेक्षण अधिकारी ही सरकारी जागा सीमांकन करपाक आयिल्ले. त्या वेळार हे सुवातेर अतिक्रमण करून घरां बेकायदेशीर रितीन बांदल्यांत अशें उक्तें जालें. ते उपरांत सर्वेक्षण खात्यान ही गजाल बार्देश उपजिल्होधिकाऱ्याचे नदरेक हाडली.
सरकारी जमनींत बेकायदेशीर बांदकाम केल्ल्यान उपजिल्होधिकाऱ्यान गोंय बांदकाम जमनी बंदी कायद्याच्या कलम 6 खाला संबंदीतांक नोटीस जारी केल्ली. ही बांदकामा मोडपा खातीर अतिक्रमण हटाव पंगडाची मागणी केल्ली. ते प्रमाण ही बांगकामा मातये भरवण करपाचे काम सोंपें जावचें म्हणून ही सुवात रिती करपाची सुचोवणी दिली.
पीटी शीट क्रमांक 1, चलता क्रमांक 10/3 आनी पीटी शीट क्रमांक 2, चलता क्रमांक 11/1 च्या कुचेली कोमुनिदाद वाठारांत 120 ते 140 घरां बेकायदेशीर रितीन बांदिल्ली. तांतूतल्या सरकारी जागेतल्या 36 घरां आड कारवाय केली. पूण लाखांनी रुपया घेवन ह्या वाठारांत बेकायदेशीर रितीन घरां बांदपाक पीडित लोकांक प्रोत्साहन दिवपी व्यक्ती मेकळें भोंवतात. कोमुनिदाद वा सरकारान अजून तांचे आड कसलीच कारवाय करूंक ना.
कुचेलीच्या सरकारी जमनींतलीं अतिक्रमण केल्लीं घरां मातये भरवण करपाचे काम सुरु केलां. ही सुवात उत्तर गोंय नियोजन उदरगत प्राधिकरणान संपादीत केल्ली. ह्या वाठारांत वट्ट 36 घरां बेकायदेशीर रितीन बांदिल्लीं सांपडलीं. ते प्रमाण हीं घरां मातये भरवण करपाचे काम सुरू आसा अशें बार्देश उपजिल्हाधिकारी कबीर शिरगांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
