भांगरभूंय | प्रतिनिधी
तिडकल्ल्या ग्रामस्थांनी वाळपय उदका पुरवण कार्यालयाचेर व्हेलो मोर्चा
वाळपय, प्रतिनिधी: पिसुर्ले पंचायत वाठारांतल्या कुंभारखण हांगा फाटल्या तीन म्हयन्यां सावन नेमान उदकाची पुरवण जायना. फाटल्या आठ दिसां सावन ही समस्या सामकी गंभीर जाल्या. हाका लागून तिडकल्ल्या बायलांनी वाळपय भौशीक उदका पुरवण कार्यालयांत वचून हे विशीं अधिकार्यांक धारेर धरले. ह्या वेळार तांणी अधिकारी वेळार मेळना असोय आरोप केला. फाटल्या तीन म्हयन्यां सावन हे विशींची समस्या निर्माण जावन लेगीत हाचे कडेन लक्ष दिनात. हाका लागून नागरिकांक वेळार उदक मेळना. हाचो परिणाम म्हळ्यार नागरिकांक हाल सोंसचे पडटात. हाका लागून सरकारान हे विशीं खरपणान लक्ष दिवचें अशी मागणी ग्रामस्थांनी केल्या.
मजगतीं, कुंभारखणच्या ग्रामस्थांनी कार्यालयांत भेट दिली. तेन्ना अधिकार्यांक भेट दिवपाक मेळूंक ना. मात फोना वयल्यान जाल्ल्या संवादांतल्यान आठ दिसांनी ह्या गांवांतली पिवपाच्या उदकाची समस्या कायमची सोडोवपाचें आस्वासन दिल्ल्याचें ग्रामस्थांनी पत्रकारां कडेन उलयतना सांगलें.
हे विशीं म्हायती अशी, पिसुर्ले पंचायत वाठारांतल्या कुंभारखण ह्या गांवांत फाटल्या तीन म्हयन्यां सावन वेळार उदक येना. नेमान उदक येनाशिल्ल्यान नागरिकांक खुबश्या समस्यांक तोंड दिवचें पडटा, असो आरोप नागरिकांनी केला. ग्रामस्थांनी फुडें सांगलें, तीन म्हयन्यां सावन रातचें ११ ते सकाळीं ५ वरां मेरेन उदकाची पुरवण सारकी जायनाशिल्ली. मात तीय उदकाची पुरवण फाटल्या ८ दिसां सावन बंद उडयल्या. उदकाची पुरवण करपाक टँकरांची वेवस्था केल्या. मात ही वेवस्था अपूर्ण जावन आसा. ताका लागून ग्रामस्थांक पिवपाच्या उदकाची समस्या जाणवपाक लागल्या असो आरोप ग्रामस्थांनी केला.
मजगतीं, दोन दिसां आदीं ह्या ग्रामस्थांनी खासा करून बायलांनी उदका पुरवण कार्यालयाक भेट दिवन संबंदीत अधिकार्यांक धारेर धरपाचो यत्न केलो. मात ह्या वेळार मुखेल अधिकार्यांची भेट जावंक ना. तरी हाजीर आशिल्ल्या अधिकार्यां कडेन तांणी चर्चा केली आनी नेमान उदक येनाशिल्ल्यान तिडक उक्तायली. शक्य आसा तितले बेगीन ह्या गांवांत पिवपाच्या उदकाची सुविधा पयलीं वरीं सुरळीत करची. नाजाल्यार हाचे वायट परिणाम भोगचे पडटले, अशी शिटकावणी ग्रामस्थांनी दिली. निमाणे तांचे मदल्या एकल्यान अधिकार्याक संपर्क करून तांचे कडेन संवाद सादलो. अधिकार्यान ह्या गांवचो उदकाचो प्रस्न आठ दिसांनी सोडोवन पुराय वेळ उदकाची पुरवण करपाचें आस्वासन दिलां अशें ग्रामस्थांनी पत्रकारां कडेन उलयतना सांगलें.
तीन म्हयन्या पसून उदकाचे त्रास सोंसतात
तीन म्हयन्यां सावन नेमान उदकाची पुरवण जायना आनी सरकार, भौशीक उदका पुरवण कार्यालयान आड नदर करप ही गजाल सामकी गंभीर. ताका लागून सध्या नागरीक तिडक उक्तायतात. गोंय सरकारान राज्यांतल्या नागरिकांक पुराय वेळ उदकाची पुरवण दिवपाचें आस्वासन दिलां. मात कुंभारखण सारकिल्ल्या गांवांनी तीन म्हयने उदक नाशिल्ल्यान ग्रामस्थांनी हुस्को उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
