भांगरभूंय | प्रतिनिधी
पणजी: आयज बायलां समाजांतल्यो व्हड जापसालदारकी सांबाळीत आपले सेवे वरवीं देशाचे उदरगतींत व्हड योगदान दीत आसात, अशें कुंडय स्टेट बँक ऑफ इंडियाच्यो वेवस्थापक ईशा नरेश हांणी सांगलें. कुंडय वाठारांतल्या न्यू इंग्लीश हायस्कुला वतीन व्हड उमेदीन आनी तरेकवार कार्यावळींनी मनयिल्ल्या संवसारीक महिला दिसाचे कार्यावळींत मुखेल सोयऱ्यो ह्या नात्यान त्यो उलयताल्यो.
कार्यावळीची येजमानकी कुंडय ग्रामपंचायतीच्यो उपसरपंच उज्वला नायक हांणी चलयली.
विद्यार्थ्यांनी सादर केल्ल्या येवकार गितान कार्यावळीची सुरवात जाली. हायस्कुलाच्यो मुख्याध्यापिका उषा नायक हांणी येवकार दिवन महिला दिसाचें म्हत्व सांगलें.
बायलांनी शिक्षणीक संदीचो लाव घेवन तरेकवार मळांचेर क्रांती घडयली. अशा वेळार तांचो आदर्श दोळ्यां मुखार दवरून हेरांनी आपले मदलो उणाव आनी भेदभाव पयस दवरून वेगळ्यावेगळ्या उपक्रमांनी वांटो घेवचो अशें कुंडय पंचायतीच्यो उपसरपंच उज्वला नायक हांणी सांगलें.
कार्यावळींत डॉ. दिपाली नायक हांणी ‘बायलांची भलायकी आनी सशक्तीकरण’ ह्या विशयाचेर मार्गदर्शन केलें. महिला दिसा निमतान हायस्कुलाच्या पालकां खातीर पाककला आनी फुलांच्यो वेणी विणपाची सर्त घडोवन हाडली. जैतिवंतांक मुखेल सोयऱ्यांचे हस्तुकीं इनामां भेटयलीं.
पुराय कार्यावळीचें सुत्रसंचालन आश्विनी खेडेकार हांणी केलें. जाल्यार श्वेता हळदणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
