भांगरभूंय | प्रतिनिधी
मडगांव, प्रतिनिधी ः कुंकळ्ळेंतल्या प्रदुशण करपी उद्देगांक घाल्लो दंड उणो आशिल्लो. पूण केंद्रीय प्रदुशण नियंत्रण मंडळाचे प्रदुशण करपी उद्देगांक दंड घालपाचें नेम थारायल्यात. त्या प्रमाण राज्य प्रदुशण मंडळान कुंकळ्ळींतल्या उद्देगांक दंड घालो अशें पर्यावरण मंत्री आलेक्स सिक्वेरा हांणी सांगलें. बुधवारा तांणी प्रसार माध्यमां कडेन संवाद सादलो.
येत्या कांय दिसांत हांव कुंकळ्ळे वचूंक ना. पूण राज्य प्रदुशण मंडळाचे कारवाय उपरांत थंयचें प्रदुशण थांबलां हाची म्हाका खात्री आसा. उद्देग-धंद्यांतल्या घाणयाऱ्या उदकाच्या प्रस्ना संबंदी उपाय येवजण करपाक मुख्यमंत्री डॉ. प्रमोद सावंत हांणी म्हाका सांगिल्लें. हाचे खातीर म्हाका आयडीसीच्या वेवस्थापकीय संचालकांक मेळोवन बसका घेवची आशिल्ली. पूण कांय कारणांक लागून ही बसका जाली ना अशें सिक्वेरा हांणी सांगलें.
तांणी सांगलें, सध्या आयडीसी आनी प्रदुशण नियंत्रण मंडळ उद्देगांतल्यान प्रक्रिया केल्ले सांड उदक हेर उद्देगां खातीर वापरूं येता काय ना हाचेर चर्चा करतात. एका उद्देगाचें प्रक्रिया केल्लें घाण उदक दुसऱ्या उद्देगाच्या उत्पादन प्रक्रियेंत वापरूं येता अशें उद्देग आमी सोदतात. हाका लागून उद्देगधंद्यांक नगरपालिका उदकाचो वापर करचो पडचो ना. अशें जालें जाल्यार ही समस्या कांय प्रमाणांत सोडोवंक मेळटा.
आवाज प्रदुशणा विशीं तांणी सांगलें, राज्यांत कांय प्रमाणांत ही समस्या आसा हें आपूण मान्य करतां. कांय दिसां आदीं रातच्या 10 ते सकाळीं 3 ह्या वेळांत हांवें दर्यादेगेवेल्या वाठाराचो नियाळ घेतलो. त्या वेळार म्हाका खंयच्याच सुवातेर आवाज प्रदुशण मेळ्ळें ना. हाचे खातीर हांवें टॅक्सी भाड्यान घेतिल्ली. घडये टॅक्सी ड्रायव्हरान मंत्री तपासणे खातीर येता अशी म्हायती दिली आसुं येता. पूण खंयच व्हड आवाजात संगीत वाजनाशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
