भांगरभूंय | प्रतिनिधी
भांगरभूंय । प्रतिनिधी
मडगांवः मुंबयच्यान कारवार दिशेन वचपी टाटा सफारी मोटार पांझरकोनी कुंकळ्ळी वाठारांत पावली तेन्ना चालकाचो मोटारी वयलो ताबो सुटलो आनी मोटार रस्त्या कुशीच्या क्राॅसाक वचून आपटली. तातूंत मोटारी सयत क्राॅसाचेंय लुकसाण जालें. कुंकळ्ळी पुलिसांनी मोटारचालक महावीर सिंग शर्मा (रा. उत्तर कर्नाटक) हाचे आड गुन्यांव नोंद केला.
मेळिल्ले म्हायती प्रमाण, महावीर सिंग शर्मा मुंबयच्यान कारवार दिशेन वतालो. पांझरकोणी कुंकळ्ळीच्या सगुणा रॅस्टोरंण्टा कडेन पावलो तेन्ना चालकाचो गाडये वयलो ताबो सुटलो. हाका लागून धोफरायत आयिल्ली मोटार रस्त्या कुशीचे दावे वटेन गेली आनी तिचो धपको क्राॅसाक बसलो. ह्या अपघातांत मोटारीच्या फुडल्या भागाचें व्हड प्रमाणांत लुकसाण जालें.
ह्या प्रकरणांत पुलिसांनी तपास करून भौशीक सुवातेचेर घाळपणान, गतीन गाडी चलोवन दुसऱ्याच्या जिवाक धोको निर्माण केल्ल्या प्रकरणांत गुन्यांव नोंद केला.
ह्या प्रकरणांत पुलीस निरिक्षक डायगो ग्रासियस हांच्या मार्गदर्शना खाला हेडकॉन्स्टेबल विनोद काणकोणकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
