भांगरभूंय | प्रतिनिधी
मडगांव, प्रतिनिधी : कुंकळ्ळी उद्देगीक वसणुकेंतल्या उदक, हवेच्या प्रदुशणाक लागून लोकांचे भलायकेचेर परिणाम जाता. हे विशीं राज्य सरकारा कडेन सेगीत कागाळ केल्ली. आतां कुंकळ्ळेंच्या नागरिकांनी राष्ट्रीय हरित लवादा कडेन कागाळ करून हाची दखल घेवपाची मागणी केल्या.
वसणुकेंतल्या प्रदुशणाचो त्रास थळाव्यांक जाता. हे विशीं नागरिकांनी आंदोलनां केल्यांत. प्रदूशण उणें करपाचे मागणे खातीर कांय दिसां आदीं विरोधी पक्ष फुडारी युरी आलेमाव हांणी जिल्लोधिकारी कार्यालयांतल्या अधिकार्यां सयत आयडीसींतल्या प्रदुशणाची पळोवणी केल्ली. उपरांत चार प्रदुशणकारी युनिटाचेर कारवाय केल्ली. मात, दंड भरुन अटींचेर ते चारूय युनीट परत सुरू करपाची परवानगी गोंय प्रदूशण नियंत्रण मंडळान दिली. उपरांत नागरिकांनी प्रदुशणाचेर कायमचे उपाय काडिनात जाल्यार जनआंदोलन करपाची शिटकावणीय दिल्या. आतां नागरीक खबीर मोरायस हांणी राष्ट्रीय हरित लवादाक ई मेल करीत कुंकळ्ळे आयडीसींतल्या प्रदुशणाची म्हायती दिली. हें प्रदूशण उणें करपाक थळाव्या प्रशासना कडल्यान कसलेच तरेचे उपाय जायनात अशेंय कळयलां. प्रकल्पांक लागून प्रदूशण जाता. उदकाच्या प्रदुशणाक लागून उदकाच्या स्रोतांचें लुकसाण जाल्ल्यान हाचो परिणाम नागरिकांचे भलायकेचेर जाता. मातयेची सुपिकताय उणी जाल्ल्यान हाचो नागरी वसणुकेक धोको आशिल्ल्याचें तांणी ईमेलांत म्हणलां.
आयडीसींतल्या प्रदुशणा विशीं मुख्यमंत्री, विरोधी पक्ष फुडारी, राज्यपाल, थळावे आमदार, गोवा प्रदूशण नियंत्रण मंडळ ह्या सगळ्यांक वेळार म्हायती दिल्या. मात हाचेर कसलेच उपाय काडूंक नात. ताका लागून राष्ट्रीय हरित लवादान पर्यावरणाच्या लुकसाणा सयत मनशाचे जिणेक धोका निर्माण जावपी प्रदुशणा विशीं कारवाय करची. प्रदूशण उणें जावपाक कोयर प्रक्रिया प्रकल्प, घाणयार्या उदकाची प्रक्रिया प्रकल्प, प्रदूशण उणें जावपा खातीर गरजेचे नेम आनी अटी सक्तीच्यो करच्यो. तशेंच थळाव्यांचे भलायकेची तपासणी करची, अशी मागणी कुंकळ्ळेच्या नागरिकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
