भांगरभूंय | प्रतिनिधी
कुंकळ्ळी लड्यांतल्या हुतात्म्यांक भाजपानूच मान दिल्ल्याचो दावो
भांगरभूंय । प्रतिनिधी
मडगांवः कुंकळ्ळी उद्देगीक वसणुकेंतले हवेचें आनी उदकाचें प्रदुशण एप्रीला उपरांत पुराय बंद जातलें, अशी हमी मुख्यमंत्री डॉ. प्रमोद सावंत हांणी दिली. पयलीं लोकांचे भलायकेक प्राधान्य दितलेस उपरांत दुसऱ्यो गजाली आसतल्यो. ते प्रमाण कार्यवाहीक सुरवात जाल्या, अशें मुख्यमंत्र्यान सांगलें.
कुंकळ्ळीचे मार्केट वेपारी आनी विक्रेते हांचे वांगडा मुख्यमंत्र्यान संवाद सादलो. ह्या वेळार तांणी उद्देगीक वसणुकेंतलें प्रदुशण बंद करपाचें आस्वासन दिलें. ह्या वेळार आदले आमदार क्लाफासियो डायस, चंद्रकांत कवळेंकार, दामोदर नायक, नरेंद्र सावयकार आनी यतीन तळावलीकार हाजीर आशिल्ले.
मुख्यमंत्री डॉ. सावंत हांणी सांगलें, कुंकळ्ळी उद्देगीक वसणुकेंत सद्दां पळोवणी करपाक सुरवात जाल्या. पंदरा दिसांनी अहवाल सरकाराक सादर करतले. ते भायर उदकाच्या प्रदुशणाचो मुद्दोय गंभीरपणान घेतला. सगळ्या प्रकल्पांतल्या उदकाचो पुनर्वापर करचो पडटलो. तें उदक स्टील प्रकल्पां खातीर वापरतले. प्रकल्पांतलें वापरिल्लें उदक परतून बोरवेलींनी सोडपाक दिवचे नात, अशेंय तांणी सांगलें.
गोंयांतल्या डबल इंजीन सरकारा वतीन कुंकळ्ळीची उदरगत करतात. आमदार क्लाफासियो डायस हांणी भाजपांत प्रवेश केले उपरांतच्या अडेज वर्सांच्या कालांत उदरगतीचीं खूबशीं कामां केल्यांत आनी आतां जीं चल्ल्यांत तीं त्याच कार्यकाळांत मंजूर केल्लीं. कुंकळ्ळींच्या वेवसायीक कॉम्प्लेक्सांतलीं दुकानां कोणाक दिवचीं हे विशींचो थाराव कुंकळ्ळी पालिके वतीन घेवपाची गरज आसा. कुंकळ्ळी पालिके कडल्यान घेतिल्ल्या थारावाचेर सरकारा वतीन निर्णय घेवपाक मेळटा. हे संबंदांत कुंकळ्ळी मुख्याधिकाऱ्या वतीन कुंकळ्ळी पालिके कडेन चर्चा करपाक सांगपाक शकता, अशें मुख्यमंत्र्यान सांगलें.
वेपाऱ्यांनी मांडिल्ल्या स्वच्छताघरांच्या आनी पार्कींगच्या प्रस्नाचेर उलयतना मुख्यमंत्र्यान सांगलें, वेवसायिकांक कुंकळ्ळी पालिके कडल्यान स्वच्छताधर उपलब्ध जायना जाल्यार गोंय सरकार बांदून दिवपाक शकता, पूण सरकारा कडेन जमीन ना. कुंकळ्ळीकार भाटकार. सोशिएदादची लेगीत जमीन आसतली. सुलभ शौचाललया खातीर जमीन उपलब्ध करून दिवची, अशें मुख्यमंत्री डॉ. सावंत हांणी सांगलें. पार्किंगे खातीर जमीन उपलब्ध करून दिली जाल्यार आनी वेपाऱ्यांनी निवेदन दिलें जाल्यार तें बांदून दिवपाक मेळटलें, अशेंय तांणी सांगलें.
कुंकळ्ळी बायपासा खातीर केंद्र सरकारा कडल्यान 310 कोटी दिल्यात. ताका लागून रस्तो भायल्यान वतलो आनी कोणाचेंच घर वा दुकान काडचें पडचें ना. जीएसटी लागू केले उपरांत सुमार 48 कोटींचो कर वनटायम सेटलमेंट येवजणेंतल्यान वेवसायिकांचें गोंय सरकारान माफ केलां, अशी म्हायती मुख्यमंत्र्यान दिली. 2014 आदीं प्रधानमंत्री कोण आशिल्ले हे लेगीत खूब जाणांक खबर ना. काँग्रेसीन काडिल्ली एकतरी येवजण सांगची, अशें आमदार युरी आलेमांव हांकां विचारिल्लें, तेन्ना तांकांय ती सांगपाक जावंक ना, अशें तांणी सांगलें. भाजपा सरकारा वतीन लोकोपयोगी खूबश्यो येवजण्यो सुरू केल्यात. घर, वीज, उदक, शौचालयांची वेवस्था, भलायकी कार्ड भाजपा सरकारान दिलां. गोंयांत खूबश्यो साधन सुविधा आनी येरादारीच्यो सुविधा दिल्यात. सुपरस्पेशालिटी हॉस्पिटल, दक्षीण गोंय जिल्हो हॉस्पिटल भाजपान केलां. काँग्रेसीन सुरवात केल्लो एकूय प्रकल्प पुराय करूंक ना. कुंकळ्ळींच्या लड्यांतल्या हुतात्म्यांक आनी हुतात्मा स्मारकाक मान भाजप सरकारानूच दिला. हुतात्मा दिसा दिल्लींत वचून कुंकळ्ळीच्या हुतात्म्यांक सन्मान दिवन आर्गां ओंपतात. खासदार फ्रान्सीस सार्दीन कुंकळ्ळी केन्ना आयिल्ले ते सांगचें. काम करूंक ना आनी कुंकळ्ळींत ये लेगीत ना, असो उमेदवार जाय तरी कित्याक? होच योग्य वेळ आसा. भाजपाक सांगात दियात आनी भाजपाच्या उमेदवाराक वेंचून हाडात, अशें मुख्यमंत्री डॉ. सावंत हांणी मागलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
