भांगरभूंय | प्रतिनिधी
फोंडें: भारतीय किसान संघा वतीन 19 डिसेंबराक दिल्ली जावपी किसान गर्जना रॅलींत गोंयांतल्यान सुमार 100 शेतकार हाजीर रावतले. शेतकारां खातीर उत्पादन खर्चाचेर आदारीत वेपारी मुल्याची मागणी, शेतकारां खातीर जीएसटी माफ करप आनी किसाम सन्मान निधींत वाड करपाचे मागणे खातीर शेतकार रॅली काडटले, अशी म्हायती गोंय प्रांताचे अध्यक्ष संजीव कुंकळ्येकार हांणी दिली.
फोंड्यां घेतिल्ले पत्रकार परिशदेक कुंकळ्येकार हांचे वांगडा गोंय प्रांताचे म्हामंत्री श्रीरंग जांभळे आनी दक्षीण गोंयचे अध्यक्ष कृष्णानंद देसाय हाजीर आशिल्ले. देशांतल्या शेतकारांक फावोशें मुल्य मेळना. ताका लागून शेतकारांचें चड लुकसाण जाता. भारतांत शेतकारांचो आंकडो उणो आसलो तरी अन्नधान्याचेर परिणाम जायना. शेतकारांक यंत्रणा तशेंच बीं खरेदी खातीर जीएसटी भरचो पडटा. शेतकार जीएसटी हेरां कडल्यान वसूल करपाक शकना, ताका लागून सरकारान हे संबंदांत गांभिर्यान विचार करपाची गरज आसा. 19 डिसेंबराक जावपी रॅलींत देशांतले सुमार 4 ते 5 लाख शेतकार वांटो घेतले. किसान गर्जना रॅली खातीर गोंयांत 17 डिसेंबर मेरेन साबार शेतकारांक मेळून जागृती करतले, अशें कुंकळ्येकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.