भांगरभूंय | प्रतिनिधी
कितें चल्लां गोंयांत आमच्या? दर दिसा अपघाती मरणां चालूच आसात. दोन दिसां पयलीं एक तरनाटी चली मेली. ह्या पंदरा दिसांत खंय पंदरा जाणांक मरण आयलें. आनी फाटल्या तीन म्हयन्यांत खंय 71 जाणांनी जीव व्हगडायलो. हातूंत चड जाण आसात स्कूटर, मोटारसायकल चलोवपी. फाटल्यान बशिल्ले तशेंच मार्गार चलपी मेल्यात. कांय कार चलोवपी आनी कुशीक बशिल्लेय मेल्यात. एक दीस तर चार जाण अपघातांनी संवसाराक अंतरले. आतां दर दिसा सकाळीं सामाजिक माध्यमां, खबरां पत्रां उक्तीं करपाकच मन कांचवेता, फाटीं सरता.
अशे कशे जातात हे अपघात? कोणाची आसता चूक ? कोणाच्या घाळपणाक लागून. जातात हे अपघात ? रस्त्या खातीर, काय शीमे भायर वाडयिल्ले गती खातीर? चड वेळ चलोवन झेम आयिल्ल्यान काय नशेंत चलयिल्ल्यान? अशे कशे ते बिनधास्त जातात? कशे विसरतात ते की घरा कडेन तांची आवय- बापूय, वाट पळयत आसात?
कांय वर्सां आदीं गोंयच्या राज्यपालान म्हणिल्लें की गोंय हें एक ‘किलर स्टेट’जालां, जीव घेवपी राज्य. तेन्ना आयचेवरी अपघात, मरणां जांवक नाशिल्लीं. तरी ताणें शिटकायिल्लें. तीं ताचीं उतरां सामकीं खरीं जावंक लागल्यांत. दोश कोणाचो? मरतल्यांचो काय गोंयच्या रस्त्यांचो? रस्ते चड रुंद, सुळसुळीत म्हण स्पीड वाडयल्ल्यान हे अपघात जातात काय आमी नेम, कायदे विसरतात म्हण जातात? कार वा स्कूटर स्टार्ट करनाफुडें आमकां वेळ जालो अशें दिसता म्हूण स्पीड वाडटा काय फिशाल चलोवपी म्हण सिद्ध करपाचें आसता आमकां?
आमचे येरादारी पुलीस कायदे मोडटल्यांक तालांव दितात. सरकारी तिजोरी भरतात….तरी आमी नेमांक पाळो कित्याक दिनात? बेशिस्त येरादारी कित्याक करतात? मात्सो जागो दिसनाफुडें दाव्यान ‘ओवरटेक’ कित्याक करतात? खरेंच वेळ जाता जाल्यार धा मिनटां पयलींच कित्याक भायर सरनात?
पन्नास वर्सां फाटीं आमचे रस्ते अशीर आशिल्ले. वाहनाय खूब कमी आशिल्लीं. एकाद्या गिरेस्ता कडेन कार वा मोटारसायकल आसताली. भौशिक येरादारी करपी तर जतनायेन चलयताले. एकमेकाक क्रॉस करतना जागो आसल्यार लेगीत दोनुय ड्रायव्हर स्पीड कमी कताले. आनी आतां…..?
पंदरा लाख लोकवस्ती आशिल्ल्या ह्या ल्हान गोंयांत खंय, पंदरा लाखां वयर वाहनां आसात. एका- एका घरांत उणींच दोन वाहनां आसातच. भौशिक येरादारीय चलता. पूण भौशीक येरादारीचेर पातयनास्तना जण एकलो आपली स्कूटर वा कार भायर काडटा. मागीर वेळार पावपाक जाय म्हणून स्पीड वाडटा आनी…..
दोन दिसां पयलीं थिये एक तरनाटें चली अपघातात गेलें. कालच खंय ताचो जल्मदीस आशिल्लो. ट्रकान चुकीचे वटेन येवन ताच्या इलेक्ट्रीक स्कूटरीक धपको दिलो. पयर एका बोलेरोन म्हाल व्हरपी रिक्षाक ठोकली. बाबडो रिक्षा ड्रायव्हर आक्ताक सोंपलो. उसगांवां एक घराबो अपघातांत सापडलो. तांचें स म्हयन्यांचें सानुलें गोमेकॉत सोंपलें. बुधवाराक राजेंद्र चव्हाण नावाच्या मनशाक रेंट अ कॅब चलोवपी पर्यटकान फाटल्यान धपको मारून उडयलो.
पर्यटकांक हें “रेंट अ कार, स्कूटर’’ प्रकरण बरेंच जिवघेणें जालां. तांकां आमच्या रस्त्यांची वळख नासता तरी ते दोफरायत चलयतात. गोंयांत सवाय म्हणटकच मात्शे ‘हाय’य आसतात. जिवाचें गोंय करतना, मौज मस्ती करतना ते नेम पाळनात आनी बेशिस्त वागतात. देखून बंदी आसून लेगीत वेळेर कार व्हरतात, पुलार चलत्या मोटारीचें दार उगडून उबे रावतात…येरादारीच्या रस्त्यार अचकीत उजव्या वटेनचें दार उगडटात…त्या दाराक आदळून दुचाकीवेले दोन तरनाटे मरतात.
तशेंच कळंगुटे, बागा, कोलवा, बाणावले, आगोंदा, पाळोलें ह्या वेळांनी बुडून मरपी भोंवडेकारांचो आंकडो दर वर्सा वाडत आसा. आनीक बायलांचेर आगळीको जावन तांचे खूनय जायत आसात. पयर दाबोळे साडेपांच वर्सांचे चलयेचेर बलात्कार करून ताका जीवेशीं माल्लें….
अशो सगळ्यो घडणुको याद करून बरोवंक लागल्यार जागो पावचो ना. आमच्या गोंयचें नांव बरें कशें उरतलें ? फकत सरकाराक बोट दाखोवपाचें काय आमी सुजाण नागरीक जावपाचें ? आमचें गोंय सैम सोबीत दवरपाचें काय किलर स्टेट जावपाचें ???
देविदास गजानन नायक
9850535051.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
