किर्तीनगर – बोणबाग रुंद केल्लो रस्तो नेमलो
भांगरभूंय | प्रतिनिधी
थळाव्या लोकां मदीं तिडकीचें वातावरण
फोंडें, प्रतिनिधीः किर्तीनगर – बोणबाग रुंद केल्लो रस्तो नेमिल्ल्यान थळावे लोक तिडक उक्तायतात. पयल्याच पावसांत रस्तो नेमिल्ल्यान कंत्राटदारान केल्ल्या कामा विशीं दुबाव निर्माण जाला.
नेमिल्ल्या रस्त्याचें काम सुरू केलां. वांगडा आयतारा उटंगाराचो पावस पडिल्ल्यान कितल्याश्याच सुवातांनी रस्त्यार झाडां पडपाच्यो घडणुको घडल्यात.
बेतोडें पंचायत वाठारांत आशिल्ल्या किर्तीनगरांतलो बगल रस्तो रुंद करप चालू आसा. कांय दिसां आदीं रुंद केल्लो रस्तो शेनवारा रातीं नेमिल्ल्यान येरादारेक धोको निर्माण जाला. कंत्राटदारान बेगोबेग दखल घेवन रस्तो नेमिल्ले सुवातेर बॅरिकेड्स आनी तकटे दवरून वाहनचालकांक धोक्याची सुचोवणी दिल्या. आयतारा सकाळ सावन रस्तो नेमिल्ले सुवातेर फातर घालून दुरूस्तीच्या कामाक सुरवात करपाचो यत्न केल्लो. पूण घोग्यांनी पावस पडिल्ल्यान कामगारांक काम करूंक मेळ्ळें ना.
बगल रस्त्या वयल्यान दीस – रात कितलींशींच जड वाहनां यो – वच करतात. हेर वाहनांचीय येरादारी चालू आसता. बायथाखोल ते कुट्टी मेरेनच्या रस्त्यार वर्सभरांत ७ जाणांक अपघाती मरण आयलां. ताका लागून रस्तो रुंद करतना कंत्राटदार घाळपण करता असो आरोप थळावे लोक करतात. बगल रस्त्याचे कुशीक आशिल्ल्या जायत्या सुवातांनी उदक भरिल्ल्यान येरादारेक धोको निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
