भांगरभूंय | प्रतिनिधी
पेडणें: पेडणें म्हालांतल्या कासारवर्णेच्या पुर्वा सरकारी हॉस्पिटलाची अवस्था सध्या सामकी बाबत जाल्या. दुयेंतींक गरजेच्या सुविधां खातीरूय व्हड आडमेळ्यांक तोंड दिवचें पडटा. गांवगिर्या वाठारांतल्या लोकां खातीर फायद्याचें थारपी हें हॉस्पिटल सध्या ताची दुरुस्ती आनी आडनदर जाल्ल्यान चर्चेक आयलां.
हॉस्पिटलाचें मोडपाक पाविल्ल्या पांख्याची दुरुस्ती सध्या जरी सुरू आसली तरी ती तात्पुरती आनी सामकी वायट दर्जाची आशिल्ल्याचो आरोप थळाव्यांनी केला. पोरण्या आनी इबाडिल्ल्या मदेराचेर सरळ पत्रे घालून पांखें दुरुस्त केलां. हाका लागून उश्णतायेंत वाड जावन दुयेतींक त्रास जावपाची शक्यताय उक्तायतात. ही दुरुस्ती म्हळ्यार कायमचो उपाय न्हय, फकत तात्पुरतो देखावो दिसता, अशी टिका नागरिकांनी केल्या.
हॉस्पिटलाच्या वाठारांत कांय दिसां पयलीं भंगारांत उडयिल्ल्यो आदल्यो ऍम्बुलन्स गाडयो उब्यो आशिल्ल्यो. तातूंत पावसाचें उदक सांठून दुयेंसां पातळपाचो धोको निर्माण जाल्लो. थळाव्यांनी हे विशीं आवाज काडले उपरांत हांगच्यान त्या ऍम्बुलन्सी काडिल्ल्याची म्हायती मेळ्ळ्या.
मजगतीं, ह्या हॉस्पिटलांत गरजेच्यो सुविधायो नाशिल्ल्यान दुयेतींक व्हड आडमेळ्यांक तोंड दिवचें पडटा. एक्स-रे मशिना खातीर दुयेतींक म्हापश्यां धाडटात. कारण हांगा सप्तकांतलयान एकदांच ऑपरेटर उपलब्ध आसता. हाका लागून अपघात जाल्ल्या आनी गरीब दुयेतींचेर अतिरिक्त अर्थीक आनी मानसीक ताण पडटा.
मोपा आंतरराष्ट्रीय विमानतळ सुरू जाले उपरांत ह्या वाठारांतली लोकसंख्या व्हडा प्रमाणांत वाडिल्ल्यान, अपघातांचें प्रमाणूय बरेंच वाडलां. हाका लागून ह्या वाठारांत सक्षम भलायकी सुविधांची गरज बरीच जाणवता. तशेंच म्हापशें जिल्लो हॉस्पिटलांतलेंय स्कॅनींग मशीन फाटल्या दोन वर्सां सावन बंद आश्ल्यिाची कागाळ आसा. हाका लागून दुयेतींक फुडल्या उपचारां खातीर गोमेकॉंत वयचें पडटा.
हे फाटभूंयेर थळाव्यांनी पेडणेंचे आमदार प्रवीण आर्लेकार, भलायकी मंत्री विश्वजीत राणे तशेंच ग्रामपंचायतीन हस्तक्षेप करून हॉस्पिटलांतल्यो सुविधा सुधारच्यो, अशी मागणी केल्या. तशेंच हॉस्पिटला खातीर स्वतंत्र व्हिजिटिंग कमिटी नेमून नियमीत देखरेख करपाचीय गरज उक्तायल्या.
गांवगिर्या वाठारांतले शेतकार आनी सामान्य नागरिकांक दर्जेदार भलायकी सेवा मेळपा खातीर ह्या हॉस्पिटलाची उदरगत बेगोबेग जावप गरजेचें अशें मत हांगचे थळावे उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
