भांगरभूंय | प्रतिनिधी
सिटीझन फॉर डेमोक्रेसीची मागणी
पणजी: गोंय मानवाधिकार आयोगा वतीन स्मार्ट वीज मिटर सुनावणे उपरांत खात्याचे अभियंते काशिनाथ शेटये हांणी चुकीची आनी उपहासात्मक राजकी विधानां केल्यांत. तांणी प्रलंबीत प्रकरणाचें चुकीचें चित्रण केल्ल्याचो आरोप सिटीझन फॉर डेमोक्रेसीचे अमर गांवकार हांणी केला. ह्या प्रकरणांत मुखेल सचिवांनी चवकशी करची. तशेंच आपल्या अधिकार क्षेत्रा भायर वचून कृती केल्ले खातीर शेटये हांचे शिस्तभंगाची कारवाय करची अशी मागणी लेगीत गांवकार हांणी केल्या.
हे विशीं सिटीझन फॉर डेमोक्रेसी वतीन मुखेल सचिवांक बरयिल्ल्या ईमेलींत म्हणलां की, मानवाधिकार आयोगान सक्तीच्या स्मार्ट मिटरा विशीं स्वेच्छा दखल घेवन सुनावणी घेतिल्ली. सुनावणी सोंपले उपरांत शेटये हांणी माध्यमांक म्हायती दितना आयोगा मुखार प्रत्यक्षांत जें घडिल्लें, ताचें सामकें चुकीचें, विपर्यस्त आनी दिशाभूल करपी चित्र मांडलां. तांणी स्मार्ट मिटर अनिवार्य आशिल्ल्याचें सांगिल्लें. तशें पळोवंक गेल्यार हें विधान वस्तुस्थितीच्या विरोधांत आसा.
हाचे आदीं केंद्रीय उर्जा मंत्री मनोहर लाल खट्टर हांणी लोकसभेंत स्पश्ट केल्लें की, अशे तरेच्या मिटराची उबारणी करप ऐच्छीक आसा. शेटये हांच्या हेर विधानांचो उद्देश आपल्या कागाळीचें निवारण सोदपी सामान्य नागरिकांचें मनोधैर्य खच्ची करण करप हो आशिल्लो. तांणी ह्या प्रकरणांत हस्तक्षेप करपी नागरिकांची जाहीरपणान लज काडिल्ली. तांणी गोंयांतल्या 7.5 लाख वीज गिरायकांचे तुळेन आयोगा मुखार फक्त मूठभर गिरायक हाजीर आशिल्ले अशें विधान केलें. शेटये हांणी अधिकृत शिश्टाचार, नागरी सेवा आचारसंहिता आनी अधिकार क्षेत्राचें गंभीर उल्लंघन केलां.
शेटये हे वीज खात्याचे अधिकृतपणान नेमणूक केल्ले म्हणयारे आसात काय कितें? तशें नासत जाल्यार तांणी खंयच्या अधिकारा खाला एका संवेदनशील आनी न्यायधीन कायदेशीर गजाली विशीं प्रसारमाध्यमांक म्हायती दिली? हाची चवकशी जावंक जाय.
शेटये हांच्या अनधिकृत आनी दिशाभूल करपी विधानांक लागून लोकां मदीं गोंदळ निर्माण जाला. ताका लागून ह्या प्रकरणाची जाता तितले बेगीन चवकशी करची आनी आपल्या अधिकार क्षेत्रा भायर वचून कृती केल्ले खातीर शेटये हांचेर योग्य ती शिस्तभंगाची कारवाय करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
