भांगरभूंय | प्रतिनिधी
मडगांव, प्रतिनिधी ः राज्यांत काल रातीं जाल्ल्या तीन वेगवेगळ्या अपघातांत तिगांक मरण आयले. सुकतळी-मोल्यां रस्त्यार पार्क केल्ल्या म्हाल येरादारी ट्रकाक धपको दिवन दुचाकी चलोवपी तन्वेश रिवणकार (रा. कुळें), फातोड्ड्यां जाल्ल्या स्वंय अपघतात दुचाकी चालक ऑलविन फर्नांडिस (फातोड्ड्यां), आनी लोटलेंत जाल्ल्या ‘हिट अँड रन’ अपघातांत चलत वचपी एकल्याक मरण आयले.
सुकतळी, मोल्यां रस्त्याचेर मोडिल्ल्या मालाच्या ट्रकाक सोमारा रातीं दुचाकीन धपको दिल्ल्यान चालक तन्वेश रिवणकार (३१, कुळें ) ह्या तरणाट्याक जाग्यारूच मरण आयलें. अपघाता उपरांत तिकडल्ल्या लोकांनी राष्ट्रीय महामार्ग कांय वेळ आडावन दवरलो. कुळें पुलिसांनी अपघाताचो पंचनामो करून ट्रक चालक मंजुनाथ शिवा बसन्नावर (३१, बेळगांव – कर्नाटक) हाका अटक केल्या.
मेळिल्ले म्हायती प्रमाण, फाटल्या दोन दिसां सावन केए- २२- डी – ०४८१ नंबराचो मालाची येरादारी करपी मोडिल्लो ट्रक पार्क केल्ले अवस्थेंत रस्त्यारूच आशिल्लो. सोमारा रातीं सुमार १०.३० वरांचेर ओला स्कुटर घेवन तन्वेश रिवणकार हो मोल्यांच्यान फोंड्यां वतालो. तेन्ना ताका रस्त्या वयलो तो मोडिल्लो ट्रक दिसूंक नाशिल्ल्यान तांणी त्या ट्रकाक धपको दिवन ताका जाग्यारूच मरण आयलें. अपघाता वेळार स्कुटर चालकान हेल्मेट घालूंक नाशिल्ल्याचें समजता. तकलेक गंभीर जखम जाल्ल्यान ताका मरण आयलें.
अपघाता उपरांत कुळें पुलिसांनी ट्रक चालकाक ताब्यांत घेतलो. तिडकल्ल्या लोकांनी तो ट्रक फोडलो. तशेंच महामार्ग आडावन दवरलो. कुळें पुलीस निरीक्षक सगुण सावंत हांणी लोकांक सजमायले. रातचो वेळ आशिल्ल्यान येरादारीचेर परिणाम दिसूंक ना.
दुसऱ्या अपघातांत फातोड्ड्यां बोलशे सर्कला कडल्यान रावणफोंड्यां वटेन वतना मॅक्स शो रुम लागसार रस्त्यार पडून जखमी जाल्लो दुचाकी चलोवपी ऑलविन फर्नांडिस (फातोड्ड्यां) हाका मरण आयलें.
मेळिल्ले म्हायती प्रमाण फातोड्ड्यांच्या बोलशे सर्कला कडल्यान रावणफोंड्यां वटेन वतना मॅक्स शो रुम लागसार रातचे 10.30 वरांचे सुमाराक हो अपघात जालो. रस्त्यार आशिल्ल्या शेंकऱ्यांचेर दुचाकी स्लीप जाली आनी रस्त्यार पडली. हांतूत ऑलविन गंभीर जखमी जालो. ताका उपचारा खातीर हॉस्पिटलांत व्हरतना मरण आयलें. पुलीस निरिक्षक नाथन आल्मेदा हांच्या फुडारपणा खाला फातोड्ड्यां पुलीस फुडली चवकशी करतात.
जाल्यार लोटलेंत जाल्ल्या तिसऱ्या अपघातांत काल मध्यानरातीं 2 वरांच्या सुमाराक चलत वचपी एकल्याक एका गाडयेन धपको दिवन पळ काडलो. हातूंत त्या चलत वचपी मनशाक मरण आयलें. मायणा- कुडतरी पुलीस गाडयेचो सोद घेतात. मरण आयिल्ल्याची आजून वळख पटूंक ना.
वेर्णें उद्देगीक वसणूक वाठारांतल्यान राय वटेन येवपी म्हामार्गाचेर लोटलें काल रातीं 2 वरांचे सुमाराक हो अपघात जालो. एका गाडयेन चलत वचपी मनशाक धपको दिलो. हांतूत ताका मरण आयलें. मरण आयिल्लो मनीस बेघर आशिल्ल्याचो अदमास आसा. ताची वळख पटोवपाचो यत्न पुलीस करतात. हाचे भायर रस्त्यार आशिल्ल्या टायराच्या खूणांक लागून उल्लेख केल्ली गाडी ट्रक आसूं येता असो अदमास आसा. निरिक्षक अरुण गावस देसाय हांच्या फुडारपणा खाला पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
