भांगरभूंय | प्रतिनिधी
प्रेमेंद्र शेटः एका दिसाचें दिवचल- सत्तरी म्हाल ओबासी महासभेचें उक्तावण
भांगरभूंय । प्रतिनिधी
दिवचलः जिणेंत जें मेळोवपाचें आसा ताचें सपन बाळगात आनी ते पुराय करपा खातीर मेहनती वांगडाच सातत्य दवरात. अपेसाचो भंय मोखून मारून आपले कार्यक्षमतेचेर विस्वास दवरून मोख मेळोवपाचो निर्धार करात, अशें मयेंचे आमदार प्रेमेंद्र शेट हांणी सांगलें.
सांखळेच्या रवींद्र भवनांत अखील भारतीय ओबीसी महासभा- गोंय विङागा वतीन आयोजीत केल्ल्या एका दिसाच्या दिवचल- सत्तरी म्हाल महामेळाव्याचें उक्तावण सुवाळ्यांत आमदार शेट उलयताले. ह्या वेळार माचयेर आदले सभापती नरहरी हळदणकार, ओबीसी महासभेचे अध्यक्ष शशीकांत घाडी, महामेळाव्याचे कार्याध्यक्ष विठोबा घाडी, राज्य समन्वयक पंकज नमशीकार, कार्यकारी अध्यक्ष संतोश आखाडकार, सरचिटणीस संतोष गांवकार, जिल्हो पंचायत वांगडी महेश सावंत, प्रदीप रेवोडकार, युवा अध्यक्ष प्रवीण परब, राज्य महिला अध्यक्ष सपना मापारी, राज्य समन्वयक गौरी धुरी, दिवचल म्हाल महिला अध्यक्ष प्रिया शेट, अजीत कांदोळकार हाजीर आशिल्ले.
ओबीसी समाजांतल्या दरेका घटकां खातीर वावुरपी अखील भारतीय ओबीसी महासभेचें गोंयांतलो वावर व्हड आसा. ओबीसी भावांक जागृत करपाचो वसो घेतला. गोंयांत ओबीसीच्या न्याय हक्कां खातीर वावुरतना सरकारा कडेन आमच्या मागण्यां खातीर नेट लावचो पडटलो. ते खातीर ही जापसालदारकी आतां गोंयचे युवा पिळगेन आपल्या भुजाचेर घेवची, अशें आमदार शेट हांणी सांगलें.
ज्या समाजांत आपूण जल्मला, वाडला, त्या समाजा विशीं आमी केन्नाच लज बाळगिनासतना सदांच अभिमान बाळगुचो. आमचो समाजूच आमकां फुडें वचपाक उर्बा दिता. तातूंत आमची उदरगत जाता. उदरगत करपाची आसत जाल्यार शिक्षणा बगर पर्याय ना. सगळ्यांनी एकवटान वावर केल्यार गोंयांत ओबीसीच्या मागण्यांक न्याय मेळटलो, अशें नरहरी हळदणकार हांणी सांगलें.
रवींद्र भवनाच्या प्रवेशदाराचेर ओबीसीची मशाल पेटोवन ती मिरवणुकेन रवींद्र भवनांत हाडली. ते उपरांत प्रदर्शन आनी रांगोळीचें उक्तावण केलें.
ह्या वेळार विवीध मळांचेर दोळे दिपकावपी काम केल्ल्या ओबीसींतल्या मानेस्तांचो सत्कार केलो. शसीकांत घाडी हांणी येवकार दिलो. पंकज नमशीकार हांणी प्रास्तावीक केलें. सुषमा सावंत हांणी सुत्रसंचालन केलें जाल्यार विठोबा घाडी हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
