भांगरभूंय | प्रतिनिधी
प्रधानमंत्री नरेंद्र मोदी : भारत उर्जा सप्तकाचें उक्तावण
बेतूल, विशेश प्रतिनिधी : प्रधानमंत्री नरेंद्र मोदी हांणी आयज बेतूल हांगा दुसर्या ‘भारत उर्जा सप्तक २०२४’चें उक्तावण केलें. ह्या वेळार ‘संवसारा खातीर भारत, संवसारा वांगडा भारत’ अशें म्हणीत प्रधानमंत्र्यांनी भाशणाक सुरवात केली. कार्बन उत्सर्जन शुन्याचेर हाडून पर्यावरणाक घटमूट करून आमी सगळ्यांक शाश्वत उदरगतीचे दिकेन चलुंया. हाचो ह्या सप्तकांत विचार करचो. देशविदेशांतल्यान आयिल्ल्या तज्ज्ञांनी तशे विचार करचे. एकमेकां कडल्यान शिकून, तंत्रज्ञानांत एकामेकांक सहकार्य करून उदरगतीचो संकल्प करुया, अशें प्रधानमंत्री मोदी हांणी सांगलें.
ह्या वेळार केंद्रीय पेट्रोलियम मंत्री हरिदीपसिंग पुरी, राज्यपाल पी. एस. श्रीधरन पिल्लई, मुख्यमंत्री डॉ. प्रमोद सावंत आनी हेर मानेस्त माचयेर हाजीर आशिल्ले. भारताक उर्जा मळार आत्मनिर्भर करप आनी ह्या मळार काम करपी स्टार्टअप्सांक उर्बा दिवप, तांचे मदीं कामाचे सांखळेची रचणूच करप, ह्या उद्देशान गोंयांत बेतूल हांगा ९ फेब्रुवारी मेरेन ‘भारत उर्जा सप्तक २०२४’चें आयोजन केलें. ह्या सप्तकाच्या उक्तावणांत प्रधानमंत्री मोदी हांणी भारताचा उर्जा मळार संबंदीत दृश्टीकोन सगळ्यां मुखार मांडलो.
चार दीस चलपी ह्या सप्तकांत १७ देशांच्या उर्जा मंत्र्यांसयत उर्जा मळार संबंदीत ३५ हजारां परस चड लोक वांटेकार जातले. ९०० परस चड लोक तांच्या वस्तूंचें प्रदर्शन करतले. कॅनडा, जर्मनी, नेदरलँड, रशिया, ब्रिटन आनी अमेरिका हांचे खातीर स्वतंत्र कुडूय उबारतले.
पेट्रोलियम पदार्थांच्या उत्पादनांत आत्मनिर्भरताय!
येवपी काळांत भारताचे अर्थवेवस्थेक वेग येतलो. भारताचो जिडीपी ७.५ टक्क्यां परस पयल्या वित्तीय स म्हयन्यांनी वाडला. संवसारभरांत भारत तिसरी अर्थवेवस्था थारतलें. वीज, ऑयल आनी एलपीजी हांचो वापर करपाक भारत तिसर्या क्रमांकाचेर आसा. म्हूण ह्या गजालींचें उत्पादनूय देशांत करचें पडलें. अर्थीक नदरेन घटमूट करपा खातीर पेट्रोलियम पदार्थांचे बाबतींत देशाक आत्मनिर्भर जावचें पडटलें, अशें प्रधानमंत्री मोदी हांणी ह्या वेळार म्हणलें.
स्वता वांगडा संवसाराची दिका थारता भारत!
भारतांत २०४५ वर्सा मेरेन मुळावे उर्जेचे मागणेंत दुपेटीन वाड जातली. ही गजाल लक्षांत घेवन भारतान आतां पसूनच तयारी सुरू केल्या. वाडपी ऊर्जेची मागणी लक्षांत घेवन देशाच्या दरेका कोनशाक उर्जा निर्मिती करतले. सध्या भारत संवसारीक मंचार उर्जा मळार भरपूर फुडें आसा. भारत स्वताचे उदरगती सयत संवसाराचे उदरगतीची दिकाय निर्धारीर करता. म्हणून तशो पायाभूत सुविधायो आमी तयार करतात. हालींच जाल्ल्या केंद्रीय अर्थसंकल्पांत सरकारान ११ लाख कोटी रुपयांची तरतूद केल्या. हातूंतलो बरोच व्हड निधी उर्जा मळा खातीर खर्च करतले. भारताची उर्जा निर्मिती तांक सेगीत वाडटा, अशी म्हायती प्रधानमंत्री नरेंद्र मोदी हांणी ह्या वेळार दिली.
पेट्रो-केमिकलची निर्यात
भारतांत घरगुती गॅसीचें उत्पादन वेगान वाडटा. ह्या मळार फुडल्या ५ ते ६ वर्सांनी ६७ बिलियन डॉलर्सची गुंतवणूक जातली. पेट्रोलियम पदार्थांचेर प्रक्रिया करपाचीं यंत्रणां भारतांत सगळ्यांत व्हडलीं आसात. ही तांक २०३० मेरेन वाडटली. सध्या पेट्रोकेमिकल निर्यात भारतान सुरू केल्या. भारत उर्जा निर्मितीचेर खूब खर्च करता, आदीं अशें केन्नाच जावंक ना. म्हणून आयज ऑयल, गॅस आनी उर्जा मळा कडेन जोडिल्लो फुडारी भारतांत गुंतवणूक करपाक इत्सूक आसा,अशेंय प्रधानमंत्री मोदी हांणी म्हणलें.
ही आदली परंपरा
‘सर्क्युलर इकॉनॉमी’ ही भारताची आदली परंपरा. ही गजाल उर्जा मळा कडेनूय संबंदीत आसा. ‘जी २०’ संमेलनाक लागून २२ देश आनी १२ आंतरराष्ट्रीय संघटना भारताच्या उर्जा मळा कडेन जोडल्यात. भारतान ह्या मळार बरीच उदरगत केल्या. भारतात जैवीक इंधनाची निर्मिती वेगान वाडल्या. २०२३ वर्सा तिचें १२ टक्क्यां परस चड उत्पादन जावपाक लागलां. २०२५ वर्सा मेरेन पेट्रोलमांतल्यान २० टक्के इथेनॉल बंद करपाचो यत्न आसा. ताचे खातीर भारतांत ९ हजार आऊटलेटवर काम सुरू आसा, अशी म्हायती प्रधानमंत्री नरेंद्र मोदी हांणी दिली.
कार्बन उत्सर्जन शुन्याचेर हाडपाचो यत्न!
ग्रामीण अर्थवेवस्थेक घटमूट करपाचो यत्न चालू आसा. ताचे खातीर गांवगिर्या वाठारांनी कॉम्प्रेस बायोगॅस बसोवपाचें येवजिलां. संवसारीक पांवड्यावयलो आंकडो पळयल्यार भारतांतल्यान फकत ४ टक्के कार्बन उत्सर्जन जाता.हातूंत आनी सुधारणा करतले. पर्यावरण राखपा खातीर आम येवपी कांय वर्सांनी हें उत्सर्जन शुन्याचेर हाडपाचो यत्न आसा, अशेंय तांणी म्हणलें.
सौरऊर्जेचो वापर भारतांत वाडटा. कांय दिसां पयलीं भारतांत १ कोटी घरांचेर सौरउर्जा पॅनल करपाची येवजण आसा. तांच्या घरांतल्यान जी अतिरिक्त वीज जातली, ती ग्रीड पावर प्लांट मेरेन व्हरपाची वेवस्था करतले, अशी म्हायती तांणी दिली.
ग्रीन हायड्रोजन मळारूय फुडें
आयज भारत ग्रीन हायड्रोजन मळारूय फुडें आसा. हायड्रोजन उत्पादनाचें केंद्र भारतांत जातलें. भारताचे ग्रीन एनर्जी सेक्टर गुंतवणूकदार आनी उद्देजकांक लावाचें थारतलें. ताचे खातीर उर्जा सप्तकाचें आयोजन केलां. आमी ‘सबका साथ, सबका विकास’ हे तत्व पाळुया. एकमेकां कडल्यान शिकुया, एकमेकांक तंत्रज्ञानांत सहकार्य करूया आनी शाश्वत फुडार करुया. पर्यावरण राखून उदरगत करुया, असो उलो प्रधानमंत्री नरेंद्र मोदी हांणी आयज गोंयांत आयिल्ले कडेन मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
