भांगरभूंय | प्रतिनिधी
मडगांव : कोंब मडगांवच्या कारे लॉ कॉलेजीच्या विद्यार्थ्यांनी कोलकाताच्या बायल दोतोराचेर जाल्ल्या बलात्कार आनी खून प्रकरणा आड मडगांवां रॅली काडली. वेळार योग्य तपास करून दोशींक ख्यास्त जावची. तशेंच असल्यो घडणुको आनीक जावच्यो न्हय हे खातीर कायद्यांत गरजेच्यो दुरुस्ती करपाची मागणी ह्या वेळार विद्यार्थ्यांनी केली.
विद्यार्थ्यांनी कोलकाताचे बायल दोतोराचेर बलात्कार आनी खून प्रकरणाचो निशेध केलो. उपरांत मडगांव पालिका बागे भोंवतणी रॅली काडून निदर्शनां केलीं. वैजकी अधिकारी हे लोकांचे जीव वाटावपा खातीर बरेच यत्न करतात आनी दुयेंतीं खातीर ते देवदूत आसतात. तांचेर जर अन्याय जाता जाल्यार खर कारवायेची गरज आसा. कायद्याची योग्य अंमलबजावणी, बेगोबेग जावपाची गरज आसा. हातूंत कळाव जावचो न्हय. अशे तरेच्या गजालीं आड ओगी रावून कांयच जावचें ना. ताचे आड आवाज काडपाची गरज आसा. ही रॅली देशांतले दरेके बायलेचेर जावपी अत्याचारांचेर योग्य कारवाय जावपा खातीर आनी तांकां न्याय मेळोवन दिवपा खातीर, तशेंच जनते मदीं जागृताय करपाक काडल्या, अशें विद्यार्थ्यांनी सांगलें. बायलांक योग्य आनी सुरक्षीत वातावरण मेळोवपाची गरज आसा, अशेंय विद्यार्थ्यांनी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
