भांगरभूंय | प्रतिनिधी
तो मेरेन बसून आंदोलन करपाची दिली शिटकावणी
पणजी : कारापूर सर्वणच्या बांदकाम प्रकल्पांत खुबशी अनियमितताय आसा. हाका लागून प्रकल्पाक दिल्ले सगले परवाने बेगोबेग फाटीं घेवपाची मागणी आमदार विरेश बोरकार हांणी केली. जो मेरेन परवाने फाटीं घेनांत तो मेरेन नगर नियोजन खात्याच्या कार्यालया मुखार बसून आंदोलन करपाचो शिटकावणी तांणी दिली. सगल्या गोंयकारांनी ह्या आंदोलनांत वाटेकार जावपचें म्हूण उलो तांणी मारलो. शुक्रारा तांणी हे विशीं पर्यावरण, नगर नियोजन खात्याच्या अधिकार्यांची भेट घेतली. ह्या वेळार विरोधी पक्ष फुडारी युरी आलेमांव, आमदार क्रुझ सिल्वा, अभिजीत प्रभूदेसाय, गोविंद शिरोडकार हांचे वांगडा ग्रामस्थ हाजीर आशिल्ले.
ह्या प्रकल्पांत नगर नियोजन कायदो मोडला. परवानगी नासतना हांगच्यो टेकड्यो कापल्यात. कांय सुवातांचेर चडटी-देंवतेचेर बांधकाम परवानो दिला. थंयच्या कोमूनिदादान परवानगी दिवंक नासतनाय यो- वच करपा खातीर रस्ता बांदला. प्रकल्पाक गरजेची पर्यावरणीय मंजुरीय मेळूंक ना. फाटलीं दोन वर्सां हे विशीं कागाळी दाखल जाल्यात. हे विशीं न्यायालयीन खटले सुरू आसात. मात तरी सरकारी अधिकारी कसलीच कारवाय करिनात. हे अधिकारी कायदो पाळपाचें सोडून मंत्री, आमदारांचें आयकतात. आयज दरेका खात्यांत अंदाधुंदीचो कारभार सुरू आसा, अशें बोरकार हांणी सांगलें.
हो प्रकल्प सुमार ५० हॅक्टर वाठारांत उबारतात. कायद्या प्रमाण हाका पर्यावरणीय मंजुरी घेवप गरजेचें. मात अशें जावंक ना. आमी आयज पर्यावरण खात्याच्या संचालकांक सगले पुरावे सादर केल्यात. तांणी सोमारा राज्य पर्यावरणीय प्रभाव मुल्यांकन समितीची बसका घेवन हे विशीं निर्णय घेतले अशें सांगलें. आम आमकां सरकाराच्या खंयच्याच तोंडी आस्वासनांचेर विस्वास ना. प्रकल्पाचे सगले परवाने रद्द करपाची प्रक्रिया आयच्यान सुरू जावपाक जाय, अशें अभिजीत प्रभुदेसाय हांणी सांगलें.
पर्यावरण उध्वस्त जाता
युरी आलेमाव हांणी सांगलें, फाटलीं कांय वर्सां नगर नियोजन कायद्यांत बदल करून सरकार गोंय विकता. हाका लागून हांगाचें पर्यावरण उध्वस्त जाता. आमी ह्या आंदोलनाक पुरायेन फाटबळ दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
