भांगरभूंय | प्रतिनिधी
पणजी: बिरेस्तारा पणजेच्या आझाद मैदानार ‘गोंय क्रांती दीस’ ही सरकारी कार्यावळ चालू आसतना मैदाना वटेन मोर्चा व्हरपी कारापूर-सर्वणच्या थळाव्या नागरिकांक पुलिसांनी ताब्यांत घेतले. पोरणें गोंय पुलीस स्टेशनांत ५० परस चड थळाव्यांक आनी समाजीक वावुरप्यांक पुलिसांनी ताब्यांत घेतले. ताब्यात घेतिल्ल्या थळाव्यांक जो मेरेन परत आझाद मैदाना कडेन हाडून सोडिनात तो मेरेन पुलीस स्टेशना लागसार खर आंदोलन करपाची शिटकावणी डॉ. स्वप्नील सालेलकार हांणी दिली. मात, पुलिसांनी आंदोलकांचेर खंयचीच दंडात्मक वा कायदेशीर कारवाय जावची ना अशें आस्वासन दिले उपरांत आंदोलन फाटीं घेतले. आंदोलन फाटीं घेतल्यारूय वादग्रस्त प्रकल्पा आडचो आमचो लढो चालूच उरतलो.
आमदार वीरेश बोरकार हांणी ह्या वेळार म्हणलें, आमी कारापुरच्या वादग्रस्त प्रकल्पाक फाटल्या कितल्याशाच दिसां सावन खर विरोध करतात. क्रांती दिसाचे पवित्र कार्यावळी खातीर आझाद मैदानाकडेन वचपी निश्पाप थळाव्यांक पुलिसांनी अचकीत ताब्यांत घेवप सामकें चुकीचें आनी निशेध करपा सारकें आसा. हे विशीं जेन्ना आमी जाप विचारली तेन्ना वरीश्ठ अधिकार्यांनी फकत ’तोंडी आदेश’ आशिल्ल्याचें सांगलें. पुलिसां कडेन कारवायेचो कसलोच लेखी आदेश उपलब्ध ना. हे पुलीस दादागिरी आड आतां पुराय गोंयकारांनी एकठांय येवपाची वेळ आयल्या. विनाशा पसून म्हजो गांव आनी गोंय वाटोवपाचें आसल्यार आयच्या क्रांती दिसा निमतान लोकांनी घरा भायर सरचें आनी ह्या लढ्याक तेंको दिवचो.
गोवा फॉरवर्डचे आमदार विजय सरदेसाय हांणी, फाटल्या कितल्याशाच दिसां सावन सरकार कारापूर-सर्वणच्या थळाव्यांया न्याय मागण्यांकडेन मुद्दम आडनदर करतात. ७८ वर्सां आदीं डॉ. राम मनोहर लोहिया हांणी गोंयांत पुर्तुगीज हुकूमशाय सरकारा आड आवाज काडिल्लो; आयज दुर्दैवान गोंयांत परत तशीच हुकूमशाय राजवट पळोवपाक मेळटा. थळाव्यांक खंयच्या कारणा खातीर ताब्यांत घेतले आनी कार्यावळ सोंपले उपरांतूय तांकां कित्याक सोडूंक नात, हाची जाप पुलिसां कडेन ना. सरकाराक जर हें आंदोलन आनीक खर जावचें न्हय अशें दिसता जाल्यार तांणी थळाव्यांक बेगोबेग मुक्त करचें. ना जाल्यार हांगा गोंयकार व्हडा प्रमाणांत जमतले आनी पुलिसांच्या ह्या चेंपणाक जाप दितले.
ताचे पयलीं ’आप’चे राष्ट्रीय संयोजक अरविंद केजरीवाल आनी गोंयचे विरोधी पक्ष फुडारी युरी आलेमाव हांणीय हे पुलीस कारवायेचो खर शब्दांनी निशेध केलो. तांणी म्हणलें, कारापूरचे जनतेचो खर विरोध असतनाय तांचेर नाका आशिल्लो बांधकाम प्रकल्प बळयां तांचेर घातला. ह्या अन्यायाचो शांतिकायेन निशेध करपाक आनी हुतात्म्यांक अभिवादन करपा खातीर आयिल्ल्या लोकांक ताब्यांत घेवप हें लोकशायेचो गळो आवुळपी आसा. गोंय पोर्तुगेजांच्या जुलमी राजवटींतल्यान मुक्त जालें खरें मात आयज गोंयांत पुर्तुगेजां परत अदीक अत्याचारी आनी दडपशायेचें सरकार राज्य करता. मात एक दीस ह्या सत्ताधार्यांचो अहंकार नक्की सोंपतलें आनी जनतेक जैत मेळटलें. आपल्या गावाच्या आनी पर्यावरणाच्या संरक्षणा खातीर संघर्श करपी दरेक गोंयकारां वांगडा आमी खंबीरपणान उबे आसात, अशी गवाय तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
