भांगरभूंय | प्रतिनिधी
कारवार, प्रतिनिधी : गोंयां सयत हेर राज्यांनीय पावसाचेर सांवार आयला. कर्नाटकाच्या कारवार जिल्ह्यांत सेगीत पडपी पावसाक लागून सगळे कडेन हुंवाराची स्थिती निर्माण जाल्या. अंकोला म्हालांतल्या शिरूरू लागसारा गंगावळी न्हंयेचे देगेर राष्ट्रीय महामार्ग ६६ चेर आयज सकाळीं पालसणां कोसळून व्हड अपघात घडला. हातूंत एक भारत पेट्रोलियमाचो टँकर न्हंयेंत पडलो. हे मातयेचे रांशी पोंदाक ९ जाण सांपडिल्ल्याचो अदमास उक्तायतात.
कारवारा कोसळिल्ल्या पालसणांनी एक जड वाहन, भारत पेट्रोलियमाचो एक टँकर आडकला. न्हंयेंत पडिल्लो टँकर न्हंयेच्या प्रवाहांतल्यान व्हांवत वतना लोकांनी पळयला. तातूंत ड्रायव्हरुय आशिल्ल्याचो दुबाव आसा.
मातये सकयल एक कार आसा आनी तातूंत पांच परस चड जाण आशिल्ल्याचें थळावे सांगतात. घडणुके सुवातेर उजो पालोवपी दळ, एनडीआरएफचे जवान दाखल जाल्यात. मातयेंत आडकल्ल्यांचो सोद घेवप चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
