भांगरभूंय | प्रतिनिधी
पणजी: गोंयांतल्या उद्देगीक वसणुकांनी दीसपट्टें हजारांनी कील अन्न फुकट वता. सरकारान मजत केल्यार फूड बँके वरवीं हे उरिल्लें अन्न गरीब लोकांक वाटूं येता. हे खातीर सरकारान धोरण निर्माण तयार करप गरजेचें आसा. हे विशीं आमी मुख्यमंत्री डॉ. प्रमोद सावंत हांकां निवेदन दितले अशी म्हायती प्रोव्हिडन्साचे डोनाल्ड फर्नांडीस हांणी दिली.
मंगळारा जाल्ले पत्रकार परिशदेंत ते उलयताले.
फर्नांडीस हांणी सांगलें, वेर्णें उद्देगीक वसणुकेंत कॅण्टिनांनी कामगारां खातीर दीसपट्टें जेवण तयार करतात. अशें आसलें तरी कसल्या ना कसल्या कारणा खातीर दिसाक सुमार तीन हजार कील अन्न फुकट वता. कॅण्टीन कंत्राटदार हे अन्न भायर उडयतात वा कोयरांत उडयतात. आमी फाटले स म्हयने वेर्णें उद्देगीक वसणुकेंतल्या णव कारखान्यांतल्यान दिसाक सुमार 300 कील अन्न एकठांय करून ते गरिबां मदीं वांट्टात.
होच उपक्रम आमी हेर काराखान्या खातीर राबोवंक सोदतात. पूण हे खातीर कामगार आनी फॅक्टरी खात्यांनी एकठांय येवन एक धोरण तयार करप गरजेचें आसा. अशें जायत जाल्यार ओलो कोयर निर्माण जावपाचें प्रमाण लेगीत उणें जातलें. राज्यांतल्या 100 परस चड कारखान्यांतलें उरिल्लें अन्न फूड बँकेक दिवपा विशीं सरकारान गंभीरपणान विचार करप गरजेचें आसा. आमी फाटलीं सात वर्सां फूड बँक चलयत आशिल्ल्याचें फर्नांडीस हांणी सांगलें.
तांणी म्हणलें, राज्यांतल्या सगल्या उद्देगीक वसणुकांनी मेळून दिसाक सादारणपणान पांच हजार कील शिल्लक अन्न फुकट वता. हें अन्न आमचे फूड बँकेक मेळ्ळ्यार वर्साक सुमार 2 लाख कील अन्न गरिबां मदीं वाटूं येतलें. आमचे संस्थे वतीन शेल्टर होम लेगीत चलयतात. हे खातीर लागपी अन्न दवरून आमी उरिल्लें अन्न वांटूंक शकतात. सरकाराची मजत मेळ्ळ्यार आमकां मनीसबळ लेगीत वाडोवंक मेळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
