भांगरभूंय | प्रतिनिधी
म्हापशें : कामुल्लेच्या सरकारी मुळावे शाळेचे इमारतींत सुरु आशिल्ल्या श्री सरस्वती विद्यामंदीर हे खाजगी शाळेंतल्या यत्ता चवथेच्या विद्यार्थ्याक मारपेट करपी शिक्षिकांक निलंबीत केलें. तशेंच तांकां अटकूय केली. पाठांतर पुस्तकाचीं पानां पिंजिल्ल्यान दोगां शिक्षिकांनी चवथेंत शिकपी विद्यार्थ्याक बरोच बडयलो. हे विशींची कागाळ त्या विद्यार्थ्याच्या बापायन कोलवाळ पुलीस स्टेशनाचेर केल्ली.
मेळिल्ले म्हायती प्रमाण, सुजल गावडे (रा. वेर्यां) आनी कनिषा गडेकार (रा. पिर्णा) ह्या दोगांय शिक्षिकांक सेवेंतल्यान निलंबीत केल्यांत. तशेंच संबंदीत शाळा वेवस्थापनान निलंबनाचो आदेश जारी करून हे विशींची म्हायती शिक्षण खात्याक दिली. कोलवाळ पुलिसांनी दुबावीत शिक्षिकां आड भारतीय न्याय संहितेच्या कलम ११८(१), १२६(२), ३५१(२) आनी ३(५) आनी गोंय बाल कायदो कलम ८ अन्वये गुन्यांव नोंद केल्लो. तशेंच दुबावितांक पुलीस स्टेशनाचेर चवकशे खातीर हजर रावपाची नोटीस धाडिल्ली. पुलिसांनी दिल्ली नोटीस पाळून दुबावीत शिक्षिकांनी बुधवारा सकाळीं १०.३० वरांचेर कोलवाळे पुलीस स्टेशनाचेर हजेरी लायली. तांणी चवकशेंत अधिकार्यां मुखार आपलें स्पष्टीकरण दिलें.
मजगतीं, आयज शिक्षक दिसाच सुजल गावडे आनी कनिषा गडेकार हांकां अटक केली.
हे विशीं निश्काळजीपणां दाखयल्ल्यान कागाळेंत चुकीच्या कलमांची नोंद केल्ल्या प्रकरणांत कोलवाळेच्या पुलीस स्टेशनांतले पुलीस निरीक्षक तशेंच तपास अधिकार्याकूय निलंबीत करचे अशी मागणी मंत्री आनी थळावे आमदार निळकंठ हळर्णकर हांणी सरकारा कडेन केली.
मजगतीं, शिक्षक दिसा निमतान आयोजीत कार्यावळींत मुख्यमंत्री डॉ. प्रमोद सावंत हांणी ह्या प्रकरणा कडेन लक्ष ओडीत म्हणलें, विद्यार्थ्यांक मारपेट जावपाचो प्रकार खंत करपा सारको आशिल्ल्यान ह्यान फुडें खाजगी वा अनुदानींत शाळांनी कसलेच तरेची अनियमितताय खपोवन घेवचे ना. हे विशीं खर कारवाय सुरू केल्या. तशेंच आयच्या काळांत शिक्षकांनी विद्यार्थ्यांक फकत पुस्तकांतलें न्यान दिवचें न्हय तर वेव्हारीक न्यान दिवपूय तितलेंच म्हत्वाचें. विद्यार्थी भावनीक नदरेन सक्षम जावचे खातीर शिक्षकांनी यत्न करचे अशेंय तांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
