भांगरभूंय | प्रतिनिधी
पक्षान घेतिल्लो निर्णय सर्वमान्य आसतलो
मडगांव: दक्षीण गोंय लोकसभा वेंचणुके खातीर भाजपाच्या उमेदवार निवडीचो प्रस्न सुटिल्लो ना. केंद्रीय फुडाऱ्यां कडल्यान बायल उमेदवारांचीं नांवां धाडपाक सांगलें उपरांत सुलक्षणा सावंत हांचेंय नांव चर्चेंत आसा. हाचेर सुलक्षणा सावंत हांणी सांगलें, आपल्या कामाची दखल घेतली हें पळोवन बरें दिसलें. पूण पक्षान घेतिल्लो निर्णय सर्वमान्य आसतलो अशेंय स्पश्ट केलें.
दक्षीण गोंय लोकसभा वेंचणुकेंतल्या उमेदवारा विशीं उलयतना भाजप महिला मोर्चाच्यो आदल्यो अध्यक्षा आनी मुख्यमंत्री डॉ. प्रमोद सावंत हांची घरकान्न सुलक्षणा सावंत हांणी सांगलें, भाजप गोंय प्रदेशाध्यक्ष सदानंद तानावडे आनी मुख्यमंत्री डॉ. प्रमोद सावंत हांणी पत्रकार परिशद घेवन समाजमाध्यम आनी हेर माध्यमांचेर सुरू आशिल्ल्या चर्चांचेर उलोवप केलें आनी खूबश्यो गजाली स्पश्ट केल्यो.
भाजपाच्या केंद्रीय समिती कडेन दक्षीण गोंयच्यान तीन नांवांची शिफारस केल्ली. पूण पक्षाच्या केंद्रीय समितीन आनी केंद्रीय फुडाऱ्यां कडल्यान ह्या नांवां मदीं बायल उमेदवारांचो आस्पाव आसचो अशें सुचयिल्लें. ही गजाल राज्यांतल्या सगल्या बायलां खातीर अभिमानाची आसा. हाचे मुखार वचून दक्षीण गोंयांत भाजपा कडल्यान बायल उमेदवाराक तिकेट दिल्यार भाजपा खातीर ही अभिमानाची गजाल आसतली. भाजपा कडल्यान बायलां सयत कार्यकर्त्यां कडेन मोटी जापसालदारकी दिल्या. शिक्षणाचे बाबतींतूय गोंय खूब मुखार आसा. सक्षम फुडारपण करपी बायलेक उमेदवारी दिले उपरांत तिका वेंचून हाडप ही बायलां कार्यकर्त्यांची जबाबदारी आसा अशें सुलक्षणा सावंत हांणी म्हणलें.
म्हज्या नांवाची चर्चा जायत आसून इतल्या वर्सांच्या कामाची दखल घेतात हें पळोवन बरें दिसता. पत्रकार आसूं वा हेर माध्यमांतल्यान म्हजें नांव मुखार आयलें. पूण पक्षाचो निर्णय हो सर्वमान्य आसतलो. पक्ष जो निर्णय घेता तो निर्णय सगल्यांक लागू आसतलो. हे खातीर सगल्यांनी एकठांय येवन काम करपाची गरज आसा. पक्ष जाका उमेदवारी दितलो ताका जैतिवंत करपा खातीर भाजपाच्या सगल्या कार्यकर्त्यांनी मुखार येवन काम करपाची गरज आसा अशें सुलक्षणा सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
