कामगारां खातीर साधनसुविधा उबारप फेडरेशनाचें काम: सिक्वेरा

भांगरभूंय | प्रतिनिधी

कुटबणां नव्या जेटीचें फुडल्या सप्तकांत उक्तावण

मडगांव: कुटबण जेटी वेल्या कामगारांक गरजेच्यो साधनसुविधा पावोवप हें बोट धनयांचें, फेडरेशनाचें काम. ताका लागून कामगारांच्या नितळसाण घरां खातीर खर्च करप ही फेडरेशनाची जापसालदारकी. गोंय सरकार गरजेचे ते सहकार्य करीत आसा. कुटबण जेटी वेली पळोवणी केले उपरांत बदल दिसून येता. हेर कांय गजाली फुडल्या सात दिसांत पुराय करतले अशें मंत्री आलेक्स सिक्वेरा हांणी सांगलें. फुडल्या सप्तकांत नव्या जेटीचो शुभारंभ करतले अशेंय तांणी स्पश्ट केलें.

दक्षीण गोंय जिल्होधिकारी कचेरेंत मंत्री आलेक्स सिक्वेरा हांणी लोकांच्यो समस्या समजून घेतल्यो. मंत्री सिक्वेरा हांणी सांगलें, हाचे पयलीं आपूण वीज मंत्री आसतना कुंकळ्ळी आयडीसींत वीज खात्या खातीर जमीन संपादीत केल्ली. आतां ते जमनीचेर अतिक्रमण केलां. वीज खात्या कडल्यान थंय राखणे वणत उबारपाचें काम करपाचें आसा. पूण कंपनी तांकां काम करूंक दिना. ताका लागून सरकारान गरजेचें ते सहकार्य वीज खात्याक दिवपाचें मान्य केलां. हाचे बगर कांय नळांच्या जोडण्यांचो विशय मांडिल्लो.

फेडरेशनाच्या पदाधिकाऱ्यांनी मंत्री आलेक्स सिक्वेरा हांची भेट घेतली. पदाधिकाऱ्यांनी सांगलें की, शौचालयाचे उबारणे खातीर फेडरेशनाक 10 लाख भरपा खातीर सांगिल्लें. त्या वेळार कॉलराचे दुयेंती चड आशिल्ले. ताका लागून तयारी दाखयिल्ली. आतां 15 सुलभ शौचालयां कार्यरत आसात. उपरांत 30 टॉयलेट, 20 बाथ टब आनी 9 युरिनस कार्यरत केले.

आतां कॉलरा दुयेंतींची संख्या उणी जाल्या. ताका लागून शौचालयांची संख्या उणी करपाची आनी समभागाची रक्कम उणी करपाची मागणी फेडरेशनान केल्ली. ते प्रमाण आतां 7 लाख भरपाक सांगलां. तशेंच कुटबण जेटीचे उबारणे उपरांत आतां मेरेन अशे तरेचीं कामां केन्नाच जावंक नाशिल्लीं. गोंय सरकार, नुस्तें विभाग, मंत्री आलेक्स सिक्वेरा, मुख्यमंत्र्या कडल्यान कुटबण जेटी वेल्यो खूबश्यो समस्या सोडोवपा खातीर फुडाकार घेतला. अशे तरेचें सहकार्य हाचे मुखारूय दवरचें अशें सिक्वेरा हांणी सांगून, जाल्ल्या कामांचेर समाधान उक्तायलें.

तशेंच मंगळारा सांजवेळा मुख्यमंत्री डॉ. प्रमोद सावंत हांचे कडल्यान कुटबण जेटीची पळोवणी करतले अशेंय तांणी मुखार उलयतना म्हणलें.