भांगरभूंय | प्रतिनिधी
चेन्नय, खबरां संस्था: कोयर नितळ करपी कामगारांक कोयराचे राशींत एक चकचकीत वस्त दिसली. लागीं वचून पळयल्यार तो लाखांनी रुपया मोलाचो हिऱ्यांचो हार आशिल्लो. चेन्नयच्या पालिका म्हामंडळाचे हे कामगार. हिर्यांचो हो हार कोयरांत कसो आयलो, हें त्या कामगारां मुखार कुवाडें आशिल्लें. उपरांत कामगारांनी उखलिल्ल्या पावलांची सगळ्याक तोखणाय जाता.
हाराचें मोल पांच लाख रुपया आसा. हो हार कामगारांनी मूळ धनयाक परत केलो. तो चेन्नयच्या विरुगमबक्कमांत रावपी देवराज हांचो आशिल्लो. तो तांचे कडल्यान शेणिल्लो. देवराजाचे आवयन हो हार आपले धुवेक लग्नाची भेट म्हणून दिल्लो. कांय दिसांनी तिचें लग्न जावपाचें आशिल्लें.
हार सांडले उपरांत देवराज हांणी रोखडीच शाराच्या नगरपालिका म्हामंडळा कडल्यान मदत मागली. ते उपरांत तांच्या घरा लागसार आशिल्ल्या कोयराच्या डब्यांनी हाराचो सोद सुरू जालो. हार सोदपाक कामगारांनी प्रामाणीकपणान आदार केलो. कोयराचे डबे तपासतना एका व्हड फुलांच्या हारांत हो हार शिरकून उरिल्लो दिसलो. कोयरांतल्यान हार सोदून काडिल्ले खातीर देवराज हांणी पालिका पंगडाचे उपकार मानले.
ज्या कामगारान हो हार सोदलो तो खरें म्हणल्यारएक ई- रिक्षा ड्रायव्हर जावन आसा. तांचें नांव अॅन्थनी सामी. तांणीच हो हार सोदून काडलो. ऑक्टोबर २०२० त नगर निगमा कडल्यान कोयर एकठांय करपा खातीर जे कंपनीक कंत्राट मेळिल्लें तातूंतलेच ते कामगार.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
