भांगरभूंय | प्रतिनिधी
श्याम आनी गाढव
एका गांवांत श्याम नांवाचो एक वेपारी रावतालो. तो मिठाचो वेपार करतालो. गिमाच्या दिसांनी मीठ काडून तो बाजारांत व्हरून विकतालो. ताचे कडेन एक गाढव आशिल्लें. ताच्या गांवा कडल्यान बाजार बरोच पयस आशिल्ल्यान त्या गाढवाच्या फाटीर मिठान भरिल्लो पोतयो तो दवरतालो आनी त्यो व्हरून बाजारांत विकतालो. ताचे ताका बरेच पयशे मेळटाले. त्या पयशांनी श्याम आपलें आनी आपल्या घरच्यांचें पोट चलयतालो.
सद्दा गाढवाच्या फाटीर मिठाच्यो पोतयो दवरून तो आपूण बाजारांत चलत वतालो. बाजारांत वतना तांकां वाटेक एक व्हाळ लागतालो. तो पार करून रोखडोच बाजार मेळटालो. व्हाळा कडेन पावतना गाढवाक बरेंऽऽ थंड दिसतालें. ताका त्या व्हाळांत पांय बुडयताच मात सुशेग मेळटालो. गाढवाचो धनी श्यामाक तें खबर आशिल्लें. म्हणून तोय आपूण मात्सो वेळ त्या व्हाळांत आपले हात, पांय, तोंड धुवपा खातीर रावतालो.
एक दीस श्यामाक एक व्हडली ऑर्डर आयली. बाजारांतल्या एका गिरायकान १० मिठाच्या पोतयांची ऑर्डर ताका दिल्ली. हरशीं तो स-सात पोतयो विकपा खातीर व्हरतालो. मात ते दीस गाढवाचे फाटीर वोजें मात्शें चड आशिल्लें. गाढवाक घेवन श्याम सकाळीं फुडें बाजारांत वचपाक भायर सरलो. वाटेक गाढवाक विसव घेवपाक मेळचो हे खातीर तो मात्सो बेगीनूच घरांतल्यान भायर सरिल्लो. चलतां चलतां ते त्या व्हाळा कडेन पावता. मात ते दीस फाटीर वजें चड आशिल्ल्यान व्हाळांत पावतांच गाढवाचो तोल वचून तें मिठाच्या पोतयां सयत त्या व्हाळांत पडटा. कांय पोतयो उदकांत पडिल्ल्यान पोतयांतलें मीठ व्हाळाच्या उदकांत विरगळटा. श्याम त्यो पडिल्ल्यो पोतयो बेगीबेगीन उखलता आनी गाढवाचे फाटीर परत दवरता. मीठ विरगळिल्ल्यान गाढवाचे फाटीवयलें वजें मात्शें उणें जाता आनी हें गाढवाक जाणवता. ताका खूब बरें दिसता.
त्या दिसा सावन गाढंव सदांच आपलो पांय निसरपाचें निमीत करून व्हाळात थपकल मारता आनी आपल्या फाटी वयलें वजें उणें करता. गाढवाचीं सदचीं नाटकां पळोवन श्याम एक युक्ती करता.
दुसर्या दिसा श्याम गाढवाचे फाटीर कापसाचें वजें हाडून दवरता. ते सदचे वरीं बाजारांत वतात. सदां भशेन गाढव आपले फाटी वयलें वजें उणे करपाक व्हाळांत पांय निसरून पडपाचें नाटक करता. गाढव व्हाळांत पडटा आनी ताचे फाटीर आशिल्लो कांपूस व्हाळाचें उदक सोंसून घेता. हलको आशिल्लो कांपूस त्या उदकान आनीक जड जाल्ल्यान गाढवाक उठपाक बरेच त्रास जाता. ताका श्याम उठपाक मजत करता पूण ताचे फाटी वयलें वजें हरशीं परस बरेंच जड जाल्लें आसता. तें बरेंच थकता. श्याम त्या दिसा गाढवाक ख्यास्त दिता आनी तें जाग्यार येता. दुसरे दीस तें वाटेर कसलींच नाटकां करिनासतना बाजारांत वता. श्यामूय आपल्या गाढवाचेर खूश जाता.
देख: कोणाक फटय नासतना आपल्या कामा कडेन प्रामाणीक रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
