काणकोण पालिकेक भारत नितळसाण लीग पुरस्कार देशांतल्या 1850 शांरांतल्या निवडः 30 सप्टेंबराक पुरस्कार भेटयतले

काणकोण पालिकेक पुरस्कार मेळिल्ल्याची म्हायती दितना नगराध्यक्ष रमाकांत नायक गांवकार आनी उपनगराध्यक्ष लक्ष्मण पागी

भांगरभूंय | प्रतिनिधी

भांगरभूंय । प्रतिनिधी
काणकोणः स्वच्छ भारत मिशन खाला भारतीय नितळसाण लीग आयोजीत शार नितळसाण अभियानांत काणकोण नगरपालिकेक पयल्या गटांत पुरस्कार जाहीर जाला. देशांतल्या 1850 परस चड शारांतल्या काणकोण पालिकेची ही निवड केल्या. काणकोण पालिका मंडळाचो नगराध्यक्ष रमाकांत नायक गांवकार आनी उपनगराध्यक्ष लक्ष्मण पागी हांणी मंगळारा पत्रकारांक ही म्हायती दिली. नवी दिल्लींत 30 सप्टेंबराक ताककोट्रा स्टेडियमात हो पुरस्कार भेटयतले.
काणकोण तालुक्यांतल्यो दर्या वेळो, चड करून पाळोळें आनी पाटणेच्यो वेळो नितळ करपाचे काम फाटल्या 17 सप्टेंबराक काणकोण पालिके वांगडाच थळावे नगरसेवक तशेंच मल्लिकार्जुन आनी चेतन मंजू देसाय म्हाविद्यालयाचे विद्यार्थी, काणकोण उच्च माध्यमीक विद्यालयाच्या विद्यार्थ्यांनी केल्लें. काणकोण पालिका वाठार नितळ दवोरपाक पालिका मंडळ प्राधान्य दिता. पाळोळे दर्या वेळ संवसारांत फामाद आसा. थंय येवपी पर्यटकांच्या माध्यमांतल्यान पालिकेक महसूल मेळटा. आपल्याक मेळपी महसुलांतल्यान पालिका आपल्या कर्मचाऱ्यांक पगार दिता. अशें करपी ही गोंयांतली घडये पयली पालिका आसा अशें रमाकांत नायकगांवकार हांणी सांगलें.
काणकोण पालिकेक पुरस्कार जाहीर केल्ल्याची म्हायती केंद्रीय स्वच्छ भारत मिशनाची जोड सचीव रूपा मिश्रा हिणे गोंयचे पालिका प्रशासन संचालक गुरुदास पिळर्णकार हांका आनी काणकोण पालिका मंडळाक एक पत्रा वरवीं कळयल्या. नवी दिल्लींत 30 सप्टेंबराक जावपी पुरस्कार भेटवण कार्यावळींत पुरस्कार घेवपा खातीर काणकोणचो नगराध्यक्ष रमाकांत नायक गांवकार आनी मुख्याधिकारी मधू नार्वेकार हाजीर रावतले. पुरस्कार जाहीर जाल्ल्यान आतां आमची जापसालदारी वाडल्या. आमकां पुरस्कार फावो जाला तातूंत सगळे नगरसेवक, मुख्याधिकारी तशेंच पालिका वाठारांतले लोक हांचे व्हडलें योगदान आसा अशें नायक गांवकारान सांगलें.