भांगरभूंय | प्रतिनिधी
भांगरभूंय । प्रतिनिधी
काणकोणः हॉस्टेलांत रावंन शिकपी एके विद्यार्थिनीचेर एका शाळेंतल्या शिक्षकान वियनभंग केल्ल्याचो आरोप सवेरा हे बिगर सरकारी संस्थेची अध्यक्ष तारा केरकार हिणे केला. ह्या प्रकाराचो पुराय तपशील तिणे दिलो ना. मात शिक्षण खात्यान संबंदीत शिक्षकाचेर शिस्तभंग केल्ले खातीर खर कारवाय करपाची मागणी केल्या.
एका शिक्षकान विद्यार्थिनीचो विनयभंग केल्ल्याची म्हायती दोन दिसां आदीं म्हाका मेळ्ळी. जाणे ती दिली ताणे शाळेचे नांव सांगलें ना. एके शाळेंतलो शिक्षक विद्यार्थिनींत सतायता इतलेंच ताणे सांगलें. आमी चवकशी केली तेन्ना खंयच्या शाळेंत हो प्रकार जालो तें आमकां कळ्ळें, अशे तारा केरकारान प्रसार माध्यमांक सांगलें.
आमी त्या शाळेच्या मुख्याध्यापका कडेन संपर्क सादलो तेन्ना ताणे विनयभंगाचो प्रकार घडलो ही गजाल खरी अशें सांगलें. मेळिल्ले म्हायती प्रमाण त्या शिक्षकान ते विद्यार्थिनीक नाका थंय हात लायलो. संबंदीत विद्यार्थिनीनूय तें मानून घेतलें. मुख्याध्यापकान त्या शिक्षकाक शिटकावणी दिल्या तशेंच विद्यार्थिनीच्या पालकानी भुरगीं कल्याण समिती कडेन कागाळ करतगीर ताणी येवंन विद्यार्थिनीचो स्टेटमेंट रिकॉर्ड केलो अशी म्हायती केरकार हिणे दिली.
संबंदीत शाळेंत विशाखा आयोगान केल्ले शिफारशी प्रमाण लिंगीक सतावणुके आड समिती स्थापन केल्ली ना. ह्या प्रकाराची काणकोण पुलीस स्टेशनांत कागाळ लेगीत केल्ली ना. त्या शिक्षका आड शिस्तभंगाची कारवाय केली ना तशेंच ताका मेमोय दिल्लो ना. मात सध्या ताका शाळेंय येवपाक मनाय केल्या अशें तिणे म्हायती दितना सांगलें.
संबंदीत शिक्षकाचे बरे राजकी संबंद आसात. आपलें राजकी वजन वापरून तो दादागिरी करता. निवृत्त जावपाक ताका आनी सात-आठ वर्सां आसात अशी म्हायती केरकारान दिली. भुरगीं कल्याण समितीक आमी ह्या विनयभंगाची म्हायती दितले. त्या शिक्षका कडेन आमकां उलोवपाक जाय अशें आमी मुख्याध्यापकाक सांगलां. आमचे कडेन विनयभंगाची कागाळ करतगीर आमी संबंदीत शिक्षकाचेर कारवाय करपाची मागणी शिक्षण खात्या कडेन करतले अशें केरकारान सांगलें. आमी केल्ले चवकशेंय हाचे पयलींच ह्या शिक्षकान विनयभंग केल्लो अशें आमकां सांगलां. भुरगीं कल्याण समिती कडेन विद्यार्थिनीच्या पालकांनी केल्ली कागाळ आशिल्ल्यान ताणी हे विशीं चवकशी करून कारवाय करची अशी आमची मागणी आसा अशें केरकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
