भांगरभूंय | प्रतिनिधी
चार रस्त्यार उक्तावण जाल्यार कदंबा बस स्टॅण्डार समारोप सुवाळो
भांगरभूंय । प्रतिनिधी
काणकोणः काणकोणां सरकारी पांवड्या वयलो शिगमो उत्सव 2 एप्रीलाक जातलो. सांजेच्या 4.30 वरांचेर शिगमो उत्सवाचें उक्तावण जातलें. जाल्यार लोकसभा वेंचणुकेची आचारसंहिता लागू जाल्ल्यान रातच्या 10 वरां मेरेनूच तो चलतलो. मुखेल सोयरे म्हूण कला आनी संस्कृती खात्याचे संचालक सगूण वेळीप, उत्तर गोंयचे सीईओ अजय गावडे, उपजिल्होधिकारी रमेश गांवकार आनी हेर मानेस्त ह्या वेळार हाजीर रावतले, अशी म्हायती काणकोण पालिकेचे मुख्याधिकारी मंगलदास गांवकार हांणी पत्रकार परिशदेंत दिली. तांचे वांगडा कार्याध्यक्ष बबेश बोरकार, सचीव सिद्धार्थ देसाय, भांडारी सुभाष महाले हाजीर आशिल्ले.
ह्या शिगमो उत्सवांत आयोजीत केल्ले चित्ररथ सर्ती खातीर पयलें इनाम 45 हजार रुपया, दुसरें 30 हजार रुपया, तिसरें 25 हजार रुपया, चवथें 20 हजार रुपया, पांचवें 15 हजार रुपया दवरलां. रोमटामेळ सर्ती खातीर पयलें इनाम 35 हजार रुपया, दुसरें 20 हजार रुपया, तिसरें 15 हजार रुपया, चवथे 10 हजार रुपया, पांचवें 9 हजार रुपया आसतलें. नाच सर्ती खातीर पयलें इनाम 17 हजार, दुसरें 12,500, तिसरें 10 हजार, चवथें 8 हजार आनी पांचवें 5 हजार रुपया तशेंच उमेद वाडोवपी इनामां म्हूण 10 पंगडांक दरेकी 4 हजार रुपया दितले. वैयक्तीक वेशभुशा सर्ती खातीर ज्येश्ठांच्या गटांत पयलें इनाम 4 हजार रुपया, दुसरें 3 हजार, तिसरें 2 हजार जाल्यार कनिश्ठ गटांत पयलें इनाम 2 हजार रुपया, दुसरें एक हजार आनी तिसरें 500 रुपया अशीं इनामां दितले.
शिगम्यांत वांटो घेवपी पंगडांनी चाररस्त्यार 3 वरां मेरेन नोंदणी करप गरजेचें आसा. काणकोणच्या सगळ्या लोकांनी ह्या उत्सवांत वांटो घेवचो, अशें कार्याध्यक्ष बबेश बोरकार हांणी मागलां. समितीन घालून दिल्ले सगळे नेम वांटो घेतिल्ल्या पंगडांनी पाळप गरजेचें आसा. चित्रपथ तीन मिटरां परस चड लांब आसचो. रोमटा मेळांत उण्यांत उण्या 75 कलाकारांचो आस्पाव आसचो. लोककला पंगडांत उण्यांत उणे 15 आनी चडांत चड 20 कलाकार आसचे. परिक्षकांचो निर्णय सगळ्या पंगडांक बांदील आसतलो. इनामां मेळिल्ल्या पंगडांत पर्यटन खात्या कडल्यान इनामां घेवचीं पडटलीं. चित्ररथां खातीर उजो पालोवपी यंत्रणां दवरप बंधनकारक आसा. आचारसंहितेक लागून शिगमो उत्सव रातच्या 10 वरांचेर बंद करतले, अशी म्हायती कार्याध्यक्ष बोरकार, सचीव देसाय आनी भांडारी महाले हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
