भांगरभूंय | प्रतिनिधी
काणकोण: काणकोणच्या पोरण्या बस स्टॅण्डा कुशीक फाटल्या 24 वर्सां पयलीं म्हणल्यार 2000 वर्सा बांदिल्लें शौचालय मोडून थंय नवें शौचालय बांदतात. नवें शौचालय बांदपाचें आशिल्ल्यान 27 जुलयाक ह्या शौचालयाची बुन्याद महनीय मानेस्ताचे हाजिरेंत केल्ली.
बुन्यादी फातर सुवाळ्या वेळार नांवतकट्याचेंय अनावरण केल्लें. देड म्हयन्यां पयलींच पोरण्या शौचालयाच्या इमारतीचेर बसयिल्लो हो नांवतक्टो ही इमारत जेसीबी मशिनाच्या आदारान मोडटना नव्यान बसयिल्ल्या नांवटक्याचोय चुरो केलो. ही इमारत मोडचे पयलीं तो नांवतक्टो काडून सुरक्षीत दवरूं येतालो. पूण इमारत मोडपाचे गडबडींत त्या नांवतकट्या कडेन आडनदर केली.
हे संबंदी काणकोण पालिकेचे आदले नगराध्यक्ष आनी चावडी प्रभागाचे नगरसेवक रमाकांत नायक गांवकार हांकां विचारलें तेन्ना कंत्राटदारान तो नांवतक्टो सुरक्षीत रितीन काडून दवरूंक जाय आशिल्लो. पूण तो काडून दवरूंक नाशिल्ल्यान कंत्राटदाराक नवो नांवतक्टो तयार करपाक सांगतले अशें नायक गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
