काणकोणां दुकानांत घुसले रानदुकर

परम पै हांच्या दुकानांतल्या सीसीटीव्ही कॅमेऱ्यांत कैद जाल्ले रानदुकर.

भांगरभूंय | प्रतिनिधी

काणकोण: चावडे वयल्या परम पै हांच्या मेट्रेस विक्री दुकानांत भितर सरून दुकानाच्या मुखेल दारा कडलो हारसो फोडिल्ले आनी दुकानांत धुमाकूळ घाल्ले ‘ते’ रानदुकर रानांत परतल्ल्याचें कांय लोकांनी पळयिल्ल्याची म्हायती दिली.

बुधवारा (25 वेर) सांजवेळा हे रानदुकर परम पै हांच्या आस्थापनांत घुशिल्ले. ते सीसीटीव्ही कॅमेऱ्यांत कैद जाल्ले आनी बोवाळ केले उपरांत मुखा वयल्या शेतांत पळून गेल्ले. 26 वेर फांतोडेर 6 वरांच्या सुमाराक ते मामलेदार कचेरे कुशीच्या कुशें ह्या शेतांतल्या रान वाटेन रानांत वतात हें पळयिल्ल्याचें चावडे वयले पूर्णाकांत आनी भानुदास हांणी सांगलें.

चावडी काणकोणां परम अजीत पै हांच्या मेट्रेस, फर्नीचर आनी हेर सामान विक्रीच्या दुकानांत बुधवारा सांजवेळा 7.15 वरांच्या सुमाराक रानदुकरांनी प्रवेश केल्ल्यान हांगा हो चर्चेचो विशय जाला.

पणसुल्यां माळरानांतल्यान हे दुकर खुशी खान हांच्या घरा कुशीच्या शेतांतल्यान बाजारांत आशिल्ल्या परम पै हांच्या दुकानांत भितर घुसले. एका फाटोफाट एक अशे धांवून येवपी ह्या रानदुकरांनी बँक ऑफ इंडिया कुशीक आशिल्ल्या दोगां दुचाकी चालकांकूय धपको दिलो, आनी उपरांत ते परम पै हांच्या दुकानांत भितर सरले. थंय आशिल्ल्या हारशाच्या प्रतिबिंबाक लागून ते दचकले आनी दुकाना मुखा वयलो हारसो फोडलो. दुकानांत आशिल्ले अजीत पै हांणी तांकां धांवडावन घाले उपरांत आयिल्ले वटेन ते धांवत गेल्ल्याचें पै हांणी सांगलें. वाहनांची येरादारी आसून लेगीत भर बाजारांत रानदुकर आयिल्ल्यान हांगा हो चर्चेचो विशय जाला.

मजगतीं, ह्या दिसांनी काणकोणच्या विवीध सुवातांनी सावज सोदपा खातीर देवाची भोवंडी घालतात आनी हे भोवंडेक भियेवनूच दुकरांचो कळप बाजारांत येवपाची शक्यताय उक्तायतात.