काणकोणांत भाजपा उमेदवारांक धा हजाराचें मताधिक्य जायः मुख्यमंत्री

भांगरभूंय | प्रतिनिधी

भांगरभूंय । प्रतिनिधी
काणकोणः गांवगिऱ्या वाठाराचो, गोंयचो आनी देशाची उदरगत करपा खातीर तिसरे फावट देशांत मोदी सरकार जाय. ते खातीर काणकोण मतदारसंघांतल्या दक्षीण गोंय लोकसभा मतदारसंघांतल्या भाजपा उमेदवाराक धा हजाराचे मताधिक्य काणकोणकारांनी दिवपाक जाय, अशें मुख्यमंत्री डॉ प्रमोद सावंत हाणी सांगलें. विकसीत भारत,मोदी गॅरंटी  कार्यावळी खाला पंतप्रधान नरेंद्र मोदी हांचे उपकार मानपा खातीर काणकोणांत आयोजीत केल्ले जाहीर  सभेंत ते उलयताले.
सभे वेळार माचयेर काणकोणचो आमदार आनी  सभापती रमेश तवडकार, समाज कल्याण मंत्री सुभाष फळदेसाय, आमदार दिगंबर कामत, आदलो उपमुख्यमंत्री  बाबू कवळेकार, आदलो खासदार नरेंद्र सावयकार, आदलो  आमदार दामू नायक, काणकोणचो नगराध्यक्ष रमाकांत नायक गांवकार, पैंगीणची सरपंच सविता तवडकार , गांवडोगरीचो सरपंच आनंदु देसाय, सेजल गांवकार, सर्वानंद  भगत, प्रभाकर गांवकार, जि.पं.वांगडी शाणु वेळीप, शोभना वेळीप, धाकू मड़कयकार , सुरेश केपेकार, काणकोण भाजपा मंडळ अध्यक्ष विशाल देसाय आशिल्लो.
2004  तें 2014 मेरेन काँग्रेसच्या राहुल गांधीन देशांतल्या लोकां खातीर कसली येवजण दिली. कसली उदरगत केली. काँग्रेसवाले मतां मागपाक दारांत येतले तेन्ना ताकां हें विचारात. फाटल्या पांच वर्सांत दक्षीण गोंयांतलो काँग्रेस खासदार फ्रान्सिस सार्दिन  कितले फावट काणकोणांत आयलो हेय ताका विचारांत अशें डॉ सावंत हाणे हाजीर आशिल्ल्यांक सांगलें. सध्या आपलो भाव लेगीत बँके कडल्यान रीण घेतना पातेना, मात पंतप्रधान नरेंद मोदी हाणी गॅरंटी घेनासतना एक लाख रुपयाचें रीण वेवसाय करपाक दिता अशें ताणे सांगलें.
नारी शक्ती, युवा शक्ती, किसान शक्ती  खातीर भाजपा  वावुरप्यांनी नरेंद्र मोदी परत देशाचे पंतप्रधान जातले हे खातीर प्रचार काम करपाक जाय अशें मुख्यमंत्र्यान सांगलें. 2003 सावन भाजपा सरकारान आदिवासी समाजाक खूब किदें दिलां. जे पंच जावपाच्या लायकीचे नात ते आरक्षण आनी अमित शहा हांचेर उलयतात आनी फुडारी जावपाक सोदतात अशी टिका रमेश तवडकारान केली. श्रमधाम येवजणे फाटल्यान पुण्यदान येवजणेची सुरवात केल्या अशी म्हायती ताणे दिली. दिगंबर कामत, सुभाष फळदेसाय हाची भाशणां जालीं. विशाल देसायान प्रास्तावीक केलें. संयज तवडकारान सूत्रसंचालन केलें.