भांगरभूंय | प्रतिनिधी
बांदकामदारान स्वता जावन मोडपाचें काम घेतलें हातांत
म्हापशें: काणका बेकायदो बांदिल्ले दुकानवजा बांदकाम मुंबय उच्च न्यायालयाच्या आदेशा प्रमाण संबंदीत बांदकामदारान स्वता जावन मोडपाचें काम हातांत घेतलां.
ह्या बेकायदो बांदकामा आड रहिवाशी संयोग नार्वेंकार हांणी उच्च न्यायालयांत याचिका दाखल केल्ली. हातूंत राज्याचे मुखेल सचीव, नगर नियोजन खात्याचे उप नगर नियोजक, पंचायत खात्याचे उप संचालक, उदका स्रोत खात्याचे कार्यकारी अभियंतो, वेर्ला-काणका ग्रामपंचायत आनी बांदकामदार सिल्वेस्टर विनोको पिंटो ई ब्रागांझा हांकां प्रतिवादी केल्ले.
उच्च न्यायालयांत सुनावणे वेळार सर्वे क्रमांक 21/11 हें बांदकाम अवैद्य आशिल्ल्याचें स्पश्ट करून न्यायालयान बांदकाम मोडून उडोवपाचे निर्देश बांदकामदाराक दिल्ले. ते प्रमाण फाटल्या 27 फेब्रुवारी दिसा सिल्वेस्टर ब्रागांझा हांणी हें बांदकाम स सप्तकां भितर स्वता जावन मोडपाचें आनी अनुपालन अहवाल सादर करपाचें उच्च न्यायालयाक प्रतिज्ञापत्र दिल्लें. ताका लागून न्यायमुर्ती वाल्मिकी मिनेझीस आनी महेश सोनक हांच्या खंडपिठान ही याचिका निकालांत काडिल्ली.
मजगतीं, आपणें केल्लें बेकायदो बांदकाम हें 103.6 चौरस मिटर क्षेत्रफळांत आसा. जाका नगर नियोजन खात्यान 27.27 चौ. मिटराची मान्यताय दिल्ली. ताका लागून मंजुरी दिल्ल्या क्षेत्रफळा परस ताचे परस अतिरिक्त केल्लें बांदकाम मोडपाचे हांव स्वेच्छेन वचन घेत आसा. तशेंच हे सुवातेंत नवें बांदकाम करपाचें आसल्यार संबंदीत सरकारी प्राधिकरणां कडल्यान आवश्यक ती परवानगी घेवनूच करतलों. हें बांदकाम करतना नाल्यांत उडयिल्लें बांदकाम साहित्य आनी टाकावू माती हाचे पयलींच काडून हो नालो नितळ केला, आनी पंदरा दिसांत नाल्याची पुरायपणान नितळसाण करतले अशी हमी ब्रागांझा हांणी उच्च न्यायालयांत सादर केल्ल्या वचनपत्रांत दिल्ली.
ह्या प्रतिज्ञापत्रा प्रमाण सोमार 1 एप्रील सावन ह्या तीन दुकानांचे बेकायदो बांदकाम जेसीबीच्या आदारान मोडपाचें काम ब्रागांझा हांणी हातांत घेवन अर्दें अदीक बांदकाम मोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
