भांगरभूंय | प्रतिनिधी
पणजी: उद्देग, वेपार आनी वाणिज्य संचालनालयान काजू प्रक्रिया उद्देगाची वाड करप आनी चालू दवरपाक आदार करपा खातीर काजू प्रक्रिया उद्देग रोजगार अनुदान येवजणेंत दुरूस्ती केल्या. काजू प्रक्रिया उद्देगा वतीन नियमीत कामगारांक दिवपी वर्सुकी पगाराच्या ५० टक्के पगाराची परतफेड करून उद्देगाक उर्बा दिवप हो येवजणेचो उद्देश आसा.
सध्याच्या नियमीत रोजगारा बाबतींत उण्यांत उणें ६ म्हयन्यांच्या तजवीजीच्या बदला आतां गोंयकार कामगारांक वर्साक उण्यात उणे १२० दीस रोजगार दिवपी सगळे काजू प्रक्रिया उद्देग हे येवजणे खातीर पात्र आसात. तशेंच जे कामगार म्हयन्याचे कमीत कमी १२ दीस कमीत कमी ८ म्हयन्यां खातीर हजेरी पटार आसतले, अशा कामगारांक अनुदाना खातीर पात्र धरतले.
उद्देग, वेपार आनी वाणिज्य संचालनालयान गोंयांतल्या सगळ्या काजू प्रक्रिया उद्देगांक हे येवजणेचो फायदो घेवपाक उलो मारला. कॅलेंडर वर्साचें म्हळ्यार जानेवारी ते डिसेंबर मेरेनचे दावे येवपी वर्साच्या ३१ मार्च पयलीं दिवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
