भांगरभूंय | प्रतिनिधी
भांगरभूंय । प्रतिनिधी
पोरणे गोंयः काकरा बांबोळी दर्या वेळेर उजो लागून पांच नुस्तेंमारी व्हड्यांचो गोबोर जालो. सोमाराक फातोडेर ही घडणूक जाली. एक नुस्तेमार फातोडेर 4 वरांचेर नुस्तेमारी खातीर वतना ताका उजो लागल्लो दिसलो अशें थळावो पंच वांगडी संदीप सावंत हाणे सांगलें. ताणे उदक घालून उजो पालोवपाचो यत्न केलो. उपरांत उजो पालोवपी दलाक उज्याची म्हायती दिली. मात तो मेरेन व्हड्यांचो गोबोर जाल्लो अशें ताणे सांगलें.
उजो लागलो काय लायलो हें मात कळपाक शकलें ना. उज्यांत व्हडी तशेंच जाळीं लासलीं. कितलें रुपयांचे लुकसाण जालें तें सांगप कुस्तार आसा अशें सावंतान सांगलें. व्हड आकाराच्या व्हड्याचें मोल सुमार 2 लाख आसा. ल्हान व्हड्याचें मोल ताचे परस उणे आसता. जाळ्याक 10 ते 50 हजार रुपये पडटात अशी म्हायती ताणे दिली.
उजो कसो लागलो हे जरी स्पश्ट जाले ना तरी घातपाताचो दुबाव व्हड्यांच्या धनयांनी उक्तायला. आगशी पुलिसांनी अनवळखी मनश्या आड गुन्यांव नोद केला. उजो लागल्ल्या व्हड्यांतलीं दोन व्हडीं लाकडाच्यो आनी दोन फायबराच्यो आसात. तणाक उजो लागून तो व्हड्यां मेरेन पावलो असो अदमास आसा. दर्या वेळेर आनीकूय व्हडीं आशिल्लीं. तेन्ना फकत पांच व्हड्यांक उजो कसो लागलो असो व्हड्यांच्या धनयाचो प्रश्न आसा.
पंच वांगड्यांची अर्थीक मजत
सान्ताक्रुजाची सरपंच जेनिफर ऑलिव्हिएरा, उपसरपंच डॉमनीक परेरा हाणी काकरा दर्या वेळेर वचून घडणुकेची पळोवणी केली. लुकसाण जाल्ल्या नुस्तेंमाऱ्यांक आपल्या पंगडांतले आठ पंच वांगडी म्हयन्याचो पगार अर्थीक मजत म्हणून दितले अशें डॉमनीक परेरा हांणे पत्रकारांक सांगलें. जिल्होधिकारी, नुस्तेमारी खात्याक नुस्तेमाऱ्याक बेगोबेग मजत दिवची अशें आमी मागलां अशी म्हायती दितना उजो लागलो काय लायलो हे पुलिसांनी सोदून काडचें अशी मागणी ताणे केल्या. लुकसाण जाल्ल्यांक अर्थीक मजत दिवपाची तजवीज पंचायतीच्या बजेटांत करतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
