भांगरभूंय | प्रतिनिधी
रिसेप्शनिस्टाचेर कळंगूट पुलिशेंत गुन्यांव दाखल
म्हापशें: आराडी कांदोळे एका गेस्ट हावसाच्या रिसेप्शना वयल्या लॅपटॉपा सयत 1 लाखांचो म्हालवज चोरिल्ल्या प्रकरणांत कळंगूट पुलिसांनी रिसेप्शनिस्ट दुबावीत आरोपी अमीत झा (अस्तंत बंगाल) हाचे आड गुन्यांव दाखल केला.
ही चोरयेची घडणूक फाटल्या 13 जानेवारी पयलीं घडली. ह्या प्रकरणांत रेणुका इन गेस्ट हावसचे चालक मनोज राजपूत हांणी पुलिशेंत कागाळ नोंद केल्या. दुबावीत आरोपी हो ह्या गेस्ट हावसार रिसेप्शनिस्ट म्हूण कामाक आशिल्लो. हाचो फायदो घेवन दुबावितान रिसेप्सना वयले 40 हजार रोख रक्कम, लॅपटाप, आयफोन मोबायल आनी रिअलमी मोबायल मेळून 1 लाखांचो म्हालवज चोरून व्हेलो.
दुबाविताचो सोद लागना. तशेंच संपर्कूय जायनाशिल्ल्यान कागाळदारान पुलिशेंत कागाळ दाखल केली. ते प्रमाण पुलिसांनी दुबाविता आड भादंसंच्या 381 कलमा खाला गुन्यांव दाखल केला. फुडलो तपास पुलीस निरिक्षक परेश नायक हांच्या मार्गदर्शना खाला हवालदार गोविंद पटनायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
