भांगरभूंय | प्रतिनिधी
म्हापशें, प्रतिनिधी ः कांदोळेच्या गणपती देवळा लागसारा चलपी गाडयेक उजो लागलो. ह्या उज्यांत पर्यटक टॅक्सी गाडी हुलपोन गोबोर जाल्ल्यान ५ लाखांचें लुकसाण जालें. म्हत्वाचें म्हळ्यार हो उजो पालोवपाच्या कामांत गुथिल्ल्या उजो पालोवपी जवानाचो मोबायल फोन चोरी जालो.
हे विशीं चड म्हायती प्रमाण, ही घडणूक बिरेस्तार ता. ३१ तारखेर दनपरां सुमार ३.१५ वरांचेर घडली. कार चालक राफायल पिटर फर्नांडीस हे आपली जीए ०३ डब्लू ६२०१ नंबराची टोयोटा ईटोअस ही पर्यटक टॅक्सी घेवन वताले. वाटेक गणपती देवळा लागसारा गाडी पावतांच अचकीत इंजिनांत शॉर्ट सर्कीट जालें आनी रोखडीच गाडी पेटली.
गाडी चालकान प्रसंग वळखून गाडयेंतल्यान भायर धांव मारली आनी उजो पालोवपी दळाक हे विशीं म्हायती दिली. पिळर्ण उजो पालोवपी दळाच्या जवानांनी घडणुके सुवातेर दखल जावन उजो नियंत्रणांत हाडलो. मात तो मेरेन पुराय गाडी हुलपोन गोबोर जाल्ली.
दळाचे उपअधिकारी सनी पायदे हांच्या नेतृत्वा खाला दळाचे विशाल पाटील, साईश च्यारी, स्वप्नील नायक, एस. सावंत, जितेंद्र बली आनी एस. मांद्रेंकार हांणी उजो पालयलो.
मजगतीं, उजो पालयतना उदकाच्या फवार्याक लागून मोबायल भिजचो न्हय म्हणून उजो पालोवपी दळाचे जवान विशाल पाटील हांणी आपलो फोन गाडयेंतूच दवरलो. मात पाटील हे गाडयेचो उजो पालोवपच्या कामांत व्यस्त आशिल्ल्याचें पळोवन एका अनवळखी चोरान ताचो फोन गाडयेर चडून चोरलो.मोबायल चोरी जाल्ल्याचें कळटांच पाटील हांणी कळंगूटे पुलिशेंत कागाळ दाखल केली. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
