भांगरभूंय | प्रतिनिधी
नातलां पयलीं वेंचणूक जातली, अशें बऱ्याच राजकी जाणकारांक दिसता. सध्या जी ताकतीक चल्ल्या ती वेंचणुकेची नांदीच. राजकी मळार, खास करून विरोधकां मदीं खवदळ जाला. कारण गोवा काँग्रेस पार्टी नांवाचो नवो पक्ष सुरू करपाच्यो हालचाली चल्ल्यात. धर्मनिरपेक्ष मतां फुटचीं हे खातीर भाजपा 100 कोटींची तजवीज करून नवो पक्ष स्थापन करता, असो गंभीर आरोप काँग्रेसीचे नवे प्रदेशाध्यक्ष गिरीश चोडणकारान केल्लो. कांय भाजपा फुडाऱ्यांनी हे न्हयकारिल्लें. मात आतां नव्या पक्षा विशीं वेंचणूक आयोगान हरकती मागल्यात. म्हणटकच आपलो अदमास खरो थारलो, अशें श्री. चोडणकार म्हणटात. ते वटेन काँग्रेसीचे फुडारी, वावुरपी बेजारल्यात, ताका लागून हो नवो पक्ष स्थापन जाता, अशें फादर एरमितो रिबेलो म्हणटात. हाचे फाटल्यान कोणाचो हात ना, अशेंय तांचें मत. म्हणटकच काँग्रेस प्रदेशाध्यक्षाचेर बेजार आशिल्ले फुडारी वेगळे जातात अशें म्हणपाचें (थोडे तशें म्हणून मेकळे जाल्यात.) काय लोकशायेक नवो पर्याय वा राजकी मतविभाजन करपाचो हो डाव, मानपाचें? आयज पणजे काँग्रेसीची बसका जाता, ती वादळी थारतली. पक्षाक अधिकृत रितीन उबी वेर वतली काय मतभेद मिट्टले, तें आयज कळटलें.
वेंचणुकेच्या तोंडार नवे पक्ष स्थापन जावप, पोरण्या पक्षांत फूट पडप, तिकेट मेळना अशें दिसतकच असंतुश्टांनी पक्षांतर करप हें नवें न्हय. पूण हे नवे पक्ष वैचारीक मतभेद जाल्ल्यान जल्माक आयले, थोड्यांनी मतां फोडपाक, चेपण घालपाक ते सुरू केले, अशेय आरोप जाले. ते सिद्ध जालेच अशें ना. निकाला उपरांत कांय वेगळ्यो चुली पेटल्यो, कांय पालवल्यो! मात, राजकारण हो बऱ्यांतलो बरो वेवसाय जाल्ल्यान जिखपा खातीर कोण खंयच्याय थराक वचपाक शकता, हें न्हयकारपाचें धाडस कोणाकूच जावचें ना! महाराष्ट्रांत 2019 त निमhण्या खिणाक वंचीत बहुजन आघाडेन स्वतंत्र वेंचणूक लडयली. हरियाणांत ताचे पयलीं जननायक जनता पक्ष जालो, बिहारांत लोक जनशक्तींत फूट पडली, आंध्रांत चिरंजीवीन प्रजा राज्यम पक्ष करून मतां फोडलीं. कांय राज्यांनी तर जिखपाची संद आशिल्ले उमेदवारूच 2 वा 3 नंबरच्या विरोधी फुडाऱ्याक आपले आड उबो करतात. हे डावपेच बरेच फावटी यशस्वी जाल्यात. तर तिकेट मेळूंक ना म्हूण बंडखोरी केल्ल्या उमेदवारांनी आपल्याच पक्षाच्या उमेदवाराचो घात केला. ‘हम तो डुबेंगे, तुमको भी साथ लेके डुबेंगे’, तसलो हो प्रकार. गोंयांत 1980 च्या दसकांत पक्षांतरांक लागून नव्या- नव्या सरकारांची खातड पडिल्ली.
पक्षा भितर नाराजी, तिकेट मेळनासप, फुडारपण बदलिल्ल्यान जाल्लो असंतोष, सत्तेर आयलेच जाल्यार वाटाघाटी करपाक मेळच्यो, जातीचीं मतां मेळोवपाक आनी हेर बऱ्याच कारणां खातीर नवे पक्ष, फुडाऱ्यांच्यो माकड उडयो चालूच आसतात. बी टीम आशिल्ल्याचो आरोप तर सदांचोच. गोवा काँग्रेस ह्या संभाव्य पक्षा विशीं चर्चा, तर्क चलतात. मात हो पक्ष स्थापन जातलोच, हाची खात्री आतांच दिवंक जावची ना. ताचे फुडारी फाटींय सरपाक शकतात. मात, हो पक्ष उबो रावलोच जाल्यार काँग्रेसीक मारक थारतलो, हातूंत कोणाकूच दुबाव आसचो ना. गोंयांत भाजप -मगोचीं मतां आनी दुसरे वटेन विरोधकांचीं मतां अशी विभागणी आसा. विरोधी पक्षांनी स्वतंत्र वेंचणूक लडयिल्ल्यान पोरूं आरजीन बरेच कडेन काँग्रेसीक धपको दिल्लो. तृणमूल, आपूय स्वतंत्र उबे राविल्ले. गोवा विकास पार्टी (मिकी), सेव्ह गोवा फ्रंट (चर्चील), युगोडेपा, गोवा राजीव काँग्रेस… कितले तरी पक्ष गोंयांत निर्माण जाल्ले.
गोंयांत 500 ते 1000 मतां हे वटेन ते वटेन जाल्यार जिखून येवपाची खात्री आशिल्लो उमेदवारूय हारपाक शकता. ताकाच लागून नव्या पक्षाचे खबरेन विरोधक अस्वस्थ जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
