काँग्रेस उमेदवार म्हणून खलप हांकां आतां मेरेन अपेसूच

भांगरभूंय | प्रतिनिधी

महाराष्ट्रवादी गोमंतक पक्षाच्या उमेदवारीचेरच थारले जैतिवंत

पणजी : काँग्रेसीचे उत्तर गोंयचे उमेदवार आनी आदले केंद्रीय मंत्री एड. रमाकांत खलप हे काँग्रेस पक्षाचे उमेदवार म्हणून वेंचणुकेंत आतां मेरेन सेगीत अपेसी थारल्यात. हे लोकसभा वेंचणुकेंत तांकां येस मेळ्ळें जाल्यार ‘जायंट किलर’ जावपाचो मान मेळटलो. हारले जाल्यार तांचो राजकी प्रवास सोंपल्यातच जमा जावपाची शक्यताय चड आसा.
राष्ट्रीय पांवड्यावेल्या फुडाऱ्यां कडेन बरेंपण आसपी ह्या फुडाऱ्यान आपल्या बुलंद आवाजान विधानसभे वांगडा संसदेंतूय आपलें कर्तुब दाखयलां. तरी लेगीत वेंचणुकेंचो विचार केल्यार काँग्रेस पक्ष चडसो तांच्या फावरांत येंवकना, अशें दिसून आयलां.
गोंयचे पयले मुख्यमंत्री सर्गेस्त दयानंद बांदोडकार हांच्या मरणा उपरांत तांणी 1974 सालांत विधानसभेंत पावल दवरले. ते उपरांत प्रत्येक विधानसभा वेंचणुकेंत ते मांद्रे मतदारसंघातल्यान जैतिवंत थारले. मगो पक्षाचे अध्यक्षपद सांबाळटना विरोधी पक्ष फुडारी म्हणून तांणी आपली कारकीर्द गाजयली. भाजपा बरोबर युती आसतना लेगीत 1994 चे विधानसभा वेंचणुकेंत काँग्रेस उमेदवार संगीता परब हांचे कडल्यान खलप हांकां हार खावची पडली. मगो- भाजपा युतीचे मुख्यमंत्रीपदाचे उमेदवार म्हणून तांच्या नावाची घोशणा जाल्ली.
उपरांत तांणी फाटोफाट तीन लोकसभा वेंचणुको लढयल्यो. 1996 सालांत लोकसभा वेंचणूक जिखले उपरांत पयले देवेगौडा आनी उपरांत गुजराल सरकारान ते मंत्री जाले. 1998 चे लोकसभा वेंचणुकेंत मगो पक्षा कडल्यान तांकां हार खावची पडली. 1999 सालांत जाल्ले विधानसभा वेचणुकेंत मांद्रे मतदारसंघांतल्यान ते मगोचे उमेदवारीचेर वेंचून आयले. उपरांत तांणी काँग्रेसीत प्रवेश केलो. ते उपरांत एड. खलप वेंचणुक जिखूंक नात.
विधानसभा वेंचणुके उपरांत कांय म्हयन्यांनी जाल्ले लोकसभा वेंचणुकेंत ते काँग्रेसीचे उमेदवार आसले. भाजपाचे श्रीपाद नायक हांणी तांचो पराभव केलो. शिंव सोडून आनी कोण उमेदवार मेळुंकना काय असो प्रचार तांच्या आड आसलो.
उपरांत 2002 आनी 2007 च्या विधानसभा वेंचणुकेंत मांद्रे मतदारसंघातल्यान काँग्रेसीन तांकां उमेदवारी दिल्ली. पुण भाजपाचे लक्ष्मीकांत पार्सेकार हांच्या कडल्यान तांकां दोनय फावट खार खावची पडली. 2007 चे वेंचणुके उपरांत आता तांकां काँग्रेसीन लोकसभेची उमेदवारी दिल्या.
आतां मेरेन सगळ्यो वेंचणुको मगोच्या उमेदवारीचेर जिखपी ह्या फुडाऱ्यांक काँग्रेस पक्षा कडल्यान आतां तरी येस मेळटलें काय? हाची उमळशीक सगळ्यांक लागून उरल्या.