भांगरभूंय | प्रतिनिधी
म्हापशें: भाजपान उत्तरेंतल्यान विद्यमान खासदाराक सवे फावटी उमेदवारी दिल्या. पूण काँग्रेसीन दक्षीणेंतले सद्याचे खासदार फ्रान्सीस सार्दीन हांकां उमेदवारी अजून जाहीर केल्ली ना. हाचोच अर्थ काँग्रेसींतले लोक सार्दीन हांकां अयेसस्वी खासदार समजतात असो आरोप भाजपाचे म्हणयारे गिरीराज पै वेर्णेंकार हांणी केलो.
मंगळारा 26 वेर म्हापश्यां पक्षाचे कचेरेंत आयोजीत केल्ले पत्रकार परिशदेंत वेर्णेंकार उलयताले. ह्या वेळार आदले आमदार ग्लेन टिकलो आनी आदले नगरसेवक राजसिंह राणे हाजीर आशिल्ले.
भाजपाच्या दोनूय लोकसभा उमेदवारां विशीं उलोवचे परस काँग्रेसीन गोंयांतल्या एका तरी मतदारसंघांतल्यान बायल उमेदवाराक पक्षाची उमेदवारी जाहीर करची. सद्या आप आनी काँग्रेसकार हे भाजपाचेर निशाणो सादीत आसात की ईडीक मुखार काडून भाजपान दिल्लीचे मुख्यमंत्री अरविंद केजरीवाल हांकां अटक केली. मुळांत दिल्लींतल्या मद्य घोटाळ्या विशीं ईडीन केजरीवाल हांकां अटक करचे पयली सुमार णव समन्स बजायिल्ले. ह्या घोटाळ्याची काँग्रेसीनूच सगल्यांत पयली कागाळ केल्ली. जाल्यार आयज काँग्रेसकार फटींगपणा करतात अशी टिका वेर्णेंकार हांणी केली.
विरोधी पक्ष फुडारी युरी आलेमांव आनी काँग्रेस प्रदेशाध्यक्ष अमीत पाटकार हांणी भाजपाच्या गोंयांतल्या लोकसभा उमेदवारा विशीं टिप्पणी करीत टिका केली. ह्या फुडाऱ्यांक निश्ठे विशीं उलोवपाचो अधिकारूच ना. युरी आलेमांव हे विवीध राजकी पक्षांचो प्रवास करून काँग्रेसींत दाखल जाल्यात. जाल्यार पाटकार हांकां जेन्ना काँग्रेसीन प्रदेशाध्यक्ष केलो तेन्ना तांकां पक्षांतल्या हेर ज्येश्ठ कार्यकर्त्यांचो विचार आयलो ना. भाजपान सदांच भोवजन समाजाक स्थान दिलां असो दावो तांणी केलो.
आम आदमी पक्षाक 2014 ते 2022 ह्या वर्सांत खलिस्तांनी गटांनी सुमार 134 कोटी रुपया देणगी दिल्ल्याचें खलिस्तान फुडारी गुरपतवंत सिंग पन्नून म्हणलां. हाचो खुलासो अमीत पालेकार हांणी करचो आनी उपरांतूच भाजपाचेर टिप्पणी करची असो सल्लो गिरीराज पै वेर्णेंकार हांणी तांकां दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
