भांगरभूंय | प्रतिनिधी
मुख्यमंत्री डॉ. प्रमोद सावंतः राहूल गांधी कडेन चर्चा करपाक दिल्ली वचपाक तयार
सांगें: राहूल गांधी हांणी ताच्या पक्षान 60 वर्सांत कितें केलें तें सांगचें आनी आपूण भाजप सरकारान 10 वर्सांत कितलीं उदरगतीचीं कामां केलीं ताची वळेरी वाचपाक तयार आसा. जाय जाल्यार दिल्ली वचून राहूल गांधी कडेन उक्ती चर्चा करपाक आपूण तयार आसा, अशें सांगून आक्रमक प्रचाराचो हेतू मुख्यमंत्री डॉ. प्रमोद सावंत उक्तो केलो.
लोकसभा वेंचणुकेक फक्त कांय दिसूच उरल्यात. ताका लागून भाजपाची दक्षीण गोंय मतदारसंघाची उमेदवार पल्लवी धेंपे हांकां घेवन भाजपान सांगें मतदारसंघांतले आराध्य दैवत श्री दामोदर आनी पाईक देवांचें दर्शन घेतलें आनी सांगें पालिकेच्या सभाघरांत कार्यकर्त्यांचें संमेलन घेवन प्रचाराक सुरवात केली. ह्या वेळार मुख्यमंत्री डॉ. सावंत उलयताले.
ह्या वेळार उमेदवार पल्लवी धेंपे समाज कल्याण मंत्री सुभाष फळदेसाय, नरेंद्र सावयकार, जिल्हो पंचायत अध्यक्ष सुवर्णा तेंडुलकार, वासुदेव मेंग गांवकार, अलका फळदेसाय, नगराध्यक्ष अर्चना गांवकार, मंडळ अध्यक्ष बायो भंडारी, सांगेंचे नगरसेवक, पंचायत वांगडी आनी कार्यकर्ते संमेलनाक हाजीर राविल्ले.
मोदी सरकारान आनी पर्यायान गोंय सरकारान शेंकड्यांनी येवजण्यो चालीक लावन गरिबांक न्याय दिवपाचो यत्न केला. काँग्रेस पक्षान एकतरी येवजण चालीक लायल्या आनी ती आयज मेरेन चालू आसा, हें दाखोवन दिवचें, अशें मुख्यमंत्री डॉ, सावंत हांणी सांगलें.
गोंयांतल्या तरणाट्यांक रोजगार मेळोवन दिवचे खातीर सरकारी जमनीर येवपी प्रकल्पांक आदार केलो जाल्यार बेरोजगारी उणी जावपाक मजत जातली. दक्षीण गोंय मतदारसंघा खातीर पक्षान दिल्ल्या उमेदवाराक सांगें वाठारांतल्यान घसघशीत मतदान करून जैतिवंत करतले, अशी आस्त मुख्यमंत्र्यान उक्तायली.
सांगें मतदारसंघांतल्यान भोवमत मेळोवन दिवचे खातीर भाजपा कार्यकर्त्यांनी एकवटान यत्न करचो. फाटले खेपे भाजपाक मेळिल्या मतां परस हे खेपे चड मतां मेळोवपा खातीर सांगेंचे कार्यकर्ते कामाक लागल्यात. सांगें हो कार्यकर्त्यांचो मतदारसंघ आशिल्ल्यान 10 हजार मतांची आघाडी सांगेंतल्यान मेळटली, असो विस्वास मंत्री सुभाष फळदेसाय हांणी उक्तायलो.
पल्लवी धेंपे ही उत्तर गोंयची मतदार आसली तरीय दक्षीण गोंयांत तिचें भुरगेंपण गेला. वेवसाय, सोयरीं- धायरी आनी इश्ट परिवार पुराय दक्षीण गोंयांत पातळ्ळा. तातूंत भर म्हूण भाजपा कार्यकर्त्यांची आशिल्ली फौज जैत मेळोवन दिवचे खातीर फावोशी आसा, अशें मंत्री फळदेसाय हांणी सांगलें. तशेंच ह्या वेळार तांणी सांगें मतदारसंघांत केल्ल्या उदरगतीच्या कामांची वळेरी वाचली.
मोदी सरकारान आपल्याक उमेदवार म्हूण मान दिल्ले खातीर केंद्रीय तशेंच गोंयांतल्या फुडाऱ्यांचे उपकार. बायलांचें सक्षमीकरण उलोवन न्हय, प्रत्यक्ष कृतीन दाखोवपी भाजप आसा. आयज बायलो सगळ्याच मळांचेर उदरगत करपाक लागल्यात. सामान्य कार्यकर्ते आनी तांच्या कुटुंबांची उदरगत जावची हें आपले सपन आसा. प्रधानमंत्र्यांनी आपल्याक उनेदवारी दिवन जो विस्वास दाखयला, त्या विस्वासाक पात्र थारचे खातीर तुमी सगळे जाण आपल्याक भोवमतांनी जैतिवंत करतले, असो विस्वास उमेदवार पल्लवी धेंपे हांणी कार्यकर्त्यांक मार्गदर्शन करतना उक्तायलो.
नरेंद्र सावयकार हांणी सांगलें, दक्षीण गोंयांतल्यान परतून एकदां भाजपाचे उमेदवार वेंचून हाडचे खातीर आमी सगळ्यांनी एकवटीत यत्न करुंया. ह्या संमेलना उपरांत सांगें वाठारांतल्या थळाव्या लोकप्रतिनिधीं वांगडा उमेदवार आनी मुख्यमंत्री, मंत्री हांची बसका जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
