भांगरभूंय | प्रतिनिधी
व्हेन्झी व्हिएगशः वेळकाडू धोरण योग्य नाशिल्ल्याचें म्हणणें
भांगरभूंय । प्रतिनिधी
मडगांवः आघाडेंतलो घटक आशिल्ल्यान आम आदमी पक्षान दक्षीण गोंयांत उमेदवार करिनासतना काँग्रेसीक सांगात दिला. मात काँग्रेसीन अजून लेगीत उमेदवार जाहीर करिनासतना वेळकाडू धोरण आपणायलां. काँग्रेसीन युवा, बऱ्या व्यक्तिमत्वाचो आनी लोकांचे प्रस्न सोडोवपाक शकता, असो उमेदवार तत्काळ जाहीर करचो, अशी मागणी आमदार व्हेन्झी व्हिएगश हांणी केल्या.
काँग्रेसीन अजून उमेदवार जाहीर करूंक नात, हाचेर आमदार व्हिएगश प्रतिक्रिया दिताले. लोकसभे खातीर आम आदमी पक्षान राष्ट्रीय पांवड्यार काँग्रेस आनी हेर पक्षां कडेन इंडिया आघाडी केल्या. ते प्रमाण काम करतले. काँग्रेसी कडेन अजून उमेदवारा संबंदांत कसलीच चर्चा जावंक ना, पूण बरो उमेदवार दिवचो. आप हो आघाडींतलो घटक आशिल्ल्यान ताचेर चड उलोवप योग्य जावचें ना, पूण काँग्रेसीन जें वेळकाडू धोरण आपणायलां तें योग्य न्हय. काँग्रेसीन बेगीन उमेदवार जाहीर करपाची गरज आसा. उमेदवार जाहीर करपाक आनिकूय कळाव केलो जाल्यार लोकां मेरेन पावतले केन्ना आनी आघाडेचो कसलो फायदो जातलो, असो प्रस्न व्हिएगश हांणी उपस्थीत केलो.
लोकसभा उमेदवार जाहीर करपाक काँग्रेस करता त्या कळावाचो आप विरोध करता. आघाडेंतलो एक घटक म्हूण आप वावुरता, पूण उमेदवार जाहीर जावपाची वाट पळयत बसपा खातीर आप काँग्रेसीचो गुलाम न्हय. मित्रपक्षांत मतभेद आसूं येतात, पूण काँग्रेसीन हें सकारात्मकतेन घेवचें. आनीक कळाव जालो जाल्यार ताचो वायट परिणाम जावं येता, अशें व्हिएगश हांणी सांगलें.
‘आपा’क गृहीत धरचो न्हयः व्हिएगश
काँग्रेसीन कसलोय उमेदवार आघाडी घटकाचेर थापचो न्हय. तशें जाल्यार आपाक वेगळो विचार करचो पडटलो. ही आघाडी एका व्हड उद्देशान तयार केल्या. अशें आसलें तरीय काँग्रेसीक जाय तशें करतले, असो ताचो अर्थ जायना. काँग्रेसी कडल्यान सदांच उमेदवार जाहीर करपा संबंदांत अशे तरेचें वेळकाडू धोरण आपणायतात. आघाडीचे घटक म्हूण काँग्रेसी वांगडा आसा, हाचो अर्थ आपाक गृहीत धरचे न्हय. आघाडांतलो मित्रपक्ष आशिल्ल्यान काँग्रेसीचें कितें चुकता तें सांगप आमची लागणूक आसा, अशें आमदार व्हेन्झी व्हिएगश हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
