भांगरभूंय | प्रतिनिधी
घटक पक्षांची काँग्रेस फुडाऱ्यां कडेन मागणी
‘इंडिया’चे घटक पक्ष निरशेले
पणजी: काँग्रेसी कडल्यान अजून लेगीत लोकसभा वेंचणुकेंतल्या उमेदवारांची नांवां जाहीर जायनाशिल्ल्यान निरशेल्ल्या इंडिया आघाडीच्या गोंयांतल्या घटक पक्षांनी आयतारा काँग्रेसीक कुशीक दवरून पणजेंत बसका घेतली. काँग्रेसीन रोखड्या रोखडे दोनूय मतदारसंघांतले उमेदवार जाहीर करून प्रचार सुरू करचो अशी मागणी घटक पक्षांच्या फुडाऱ्यांनी काँग्रेसीच्या वरिश्ठ फुडाऱ्यां कडेन केल्या.
ह्या वेळार लोकसभा वेंचणुकेच्या रिंगणांत आशिल्ल्या भाजप आनी रिव्हॉल्युशनरी गोवन्स (आरजीपी) ह्या दोनूय पक्षांनी आपले दोनूय मतदारसंघांतले उमेदवार जाहीर करून तांचो प्रचारूय सुरू केला. पूण विरोधी काँग्रेस पक्षा कडल्यान मात अजून लेगीत उमेदवारांच्या नांवांची घोशणा जाल्ली ना.
गोंयांतले उमेदवार जाहीर करपा विशीं काँग्रेसीच्या थळाव्या आनी दिल्लींतल्या फुडाऱ्यां कडल्यान फक्त तारखो दितात. पूण दिल्ले तारखेक उमेदवारांची घोशणा जायनाशिल्ल्यान इंडिया आघाडीतले आम आदमी पार्टी (आप), गोवा फॉरवर्डा सयत हेर घटक पक्षूय निरशेल्यात. हेच निरशेवणेंतल्यान ह्या घटक पक्षांनी आयतारा बसका घेतली. काँग्रेसीन रोखड्या रोखडी दोनूय मतदारसंघांतलीं नांवां जाहीर करून तांचो प्रचार सुरू कराचो अशी मागणी घटक पक्षांनी काँग्रेस फुडाऱ्यां कडेन केल्या अशी म्हायती आपचे निमंत्रक अमीत पालेकार हांणी ‘भांगरभूंय’ कडेन उलयतना दिली.
उमेदवारीचे घोडे अडलें खंय?
– प्रदेश काँग्रेसी कडल्यान उत्तर गोंयच्या उमेदवारी खातीर आदले केंद्रीय कायदो मंत्री अॅड. रमाकांत खलप आनी सरचिटणीस विजय भिके हांची, जाल्यार दक्षीण गोंया खातीर सद्याचे खासदार फ्रान्सीस सार्दीन, आदले प्रदेशाध्यक्ष गिरीश चोडणकार आनी सरचिटणीस विरियातो फर्नांडीस हांची नांवां दिल्लींत गेल्लीं.
– काँग्रेसीच्या वेंचणूक समितीन उत्तर गोंयांतल्यान प्रदेश काँग्रेसीचे उपाध्यक्ष सुनील कवठणकार आनी दक्षीण गोंयांतल्यान गिरीश चोडणकार हांच्या नांवांक पसंती दिल्ली. पूण प्रदेशाध्यक्ष अमीत पाटकार आनी विरोधी पक्ष फुडारी युरी आलेमांव हांणी ह्या नांवांक विरोध केलो. उपरांत दोनूय मतदारसंघांतले काँग्रेस पदाधिकारी आनी कार्यकर्त्यां कडल्यानूय ह्या नांवांक विरोध जावंक लागला.
– ह्या सगल्या प्रकाराक लागून प्रदेश काँग्रेसींत परतून एकदां गिरीश चोडणकार आनी अमीत पाटकार अशे दोन गट तयार जाल्यात. पाटकार प्रदेशाध्यक्ष आसात. ताका लागून ह्या दोगां मदल्या कोणाक प्राधान्य दिवचें असो प्रस्न वरिश्ठ फुडाऱ्यां मुखार आशिल्ल्यान उमेदवार अजून लेगीत निश्चीत जायनाशिल्ल्याचें काँग्रेसीच्या गोपांनी सांगलें.
आप मुखार; काँग्रेस थंड
– भाजपा आड सगले पक्ष ह्या वेळार एकठांय आयिल्ल्यान काँग्रेसीचे दोनूय उमेदवार वेंचून येतले असो पुराय विस्वास इंडिया आघाडीच्या घटक पक्षांक आशिल्लो. पूण भाजप आनी आरजीपीन उमेदवार जाहीर करून तांचो प्रचार सुरू केल्लो आसतनाय काँग्रेसी कडल्यान अजून उमेदवारूच जाहीर जायनाशिल्ल्यान ह्या घटक पक्षां मदीं लेगीत गोंदळ निर्माण जाला.
– आपान इंडिया आघाडीच्या बॅनरा खाला राज्यांतल्या वैयक्तीक पांवड्यार इंडिया आघाडीच्या उमेदवारांक वेंचून हाडपा खातीर एकठांय येवपाचो प्रचार सुरू केला. तरी लेगीत काँग्रेसीच्या फुडाऱ्यांक हाचें कांयच पडून वचूंक नाशिल्ल्यान काँग्रेस कार्यकर्त्यां मदीं लेगीत सुमारा भायर निरशेवणी पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
