भांगरभूंय | प्रतिनिधी
मुख्यमंत्री डॉ. प्रमोद सावंतः सांखळी मतदारसंघांत भाजपाचें संपर्क अभियान
भांगरभूंय । प्रतिनिधी
दिवचलः 60 वर्सांत काँग्रेसीन लोकांक लुटल्यात. आतां तांणी आपलें दुकान बंद करचें. कारण फुडलीं 25 वर्सां भाजपाचें सरकार देशांत कायम उरतलें. काँग्रेसीक 60 वर्सांत जें जमलें ना तें प्रधानमंत्री नरेंद्र मोदी हांणी 10 वर्सांत करून दाखयलें, संवसारीक पांवड्यार भारताचो मान- सन्मान वाडयलो. फुडल्या काळांत परतून एकदां मोदी सरकार सत्तेर येतलें. गोंयांतल्या दोनूय सुवातांचेर भाजपाक जैतिवंत करचे, असो उलो मुख्यमंत्री डॉ. प्रमोद सावंत हांणी सांगलें.
उत्तर गोंयांत भाजप उमेदवार श्रीपाद नायक हांच्या प्रचारा खातीर सांखळी मतदारसंघांत सगळ्या पंचायत विभागांत देवदर्शन, कोनसो बसका तशेंच संपर्क अभियान चालीक लायलें. ह्या वेळार नगराध्यक्ष रश्मी देसाय, उपनगराध्यक्ष आनंद काणेकार, सगळे नगरसेवक, सरपंच कालिदास गांवस, कृष्णा गांवस, राजन फाळकार, संजय नायक, गोपाळ सुर्लकार तशेंच भाजपाचे सगळे पदाधिकारी आनी कार्यकर्ते हाजीर आशिल्ले.
देश प्रथम हो भाजपाचो विचार. तेच भावनेन सर्वधर्मसमभाव मानू नमुळाव्या मानवी आनी आधुनीक उदरगतीची गंगा 10 वर्सांत हाडपांत व्हड येस मेळयलां. ल्हान व्हड मतभेद विसरून सगळ्यांनी मोदी हांकां मतदान करपा खातीर एकवटीत जावचे, अशें मुख्यमंत्री डॉ. सावंत हांणी सांगलें. फाटल्या 25 वर्सांत श्रीपाद नायक हांणी केंद्र आनी गोंयच्या येवजण्यांक चालना दितना खूबशीं बरीं कामां केल्यांत, मात ताचें पेरगांव मात केन्ना घालूंक ना, अशेंय तांणी सांगलें.
25 वर्सां लोकांनी सांगात दिलो. ह्या काळांत खूबश्या येवजण्यांक चालना दिली. शिक्षण, भलायकी, मुळाव्या सुविधा वांगडाच खूबशे प्रकल्प चालीक लावपाची संद मेळ्ळी. राजकारण समाज साधनेचें एक मुख्य साधन आसा. ताका लागून परतून एकदां पक्षान दिल्ली जापसालदारकी पुराय करचे खातीर आपूण सक्रीय जालां. लोकांनी हें मुखारूय आपल्याक सांगात दिवचो, अशें भाजपाचे उत्तर गोंय लोकसभा उमेदवार श्रीपाद नायक हांणी सांगलें.
मतदारसंघांतल्या विवीध देवळांनी आपणे देवदर्शन घेतलें. त्या वेळार लोकांक मेळ्ळों. लोकांनी आपल्याक बरो प्रतिसाद दिलो. थळाव्या पांवड्या वयले कांय प्रस्न लोकांनी मांडले. त्या येवजण्यांक चालना दिवपाची हमी, नायक हांणी दिली. सांखळी मतदारसंघांतल्या सगळ्या पंचायत विभागांतल्यान भाजपाक बरो प्रतिसाद दिवचो, असो उलो मंडळ अध्यक्ष गोपाळ सुर्लीकार हांणी कार्यकर्त्यां कडेन मागलें.
राहूल गांधी हांकां उक्तें आव्हान
राहूल गांधी भाजपाचेर फटकीरे आरोप करीत सुटला. मात तांणी काँग्रेसीन फाटल्या 60 वर्सांत कितें केलां, तें दाखोवचें. आपूण तांकां उक्तें आव्हान दिता, दिल्लींत येवन तांणी काँग्रेसीचीं 60 वर्सां आनी नरेंद्र मोदी हांचीं 10 वर्सां हांचे मदीं तुळा करतना खरी उदरगत कोणे केली तें थारावचें.
सांखळे आयटी प्रकल्पा खातीर यत्न
सांखळी मतदारसंघांत आधुनीक सुविधा उपलब्ध केल्यात. सांखळी वा हरवळें वाठारांत कोमुनिदाद आनी हेरांनी सुवात उपलब्ध करून दिली जाल्यार आयटी प्रकल्प उबारचे खातीर सगळे तरेचे यत्न करतले, अशी म्हायती मुख्यमंत्री डॉ. प्रमोद सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
