भांगरभूंय | प्रतिनिधी
लोकसभा सचिवालयाचें पत्र: आठ वर्सां वेंचणूक बंदी?
उच्च न्यायालयांत अपील करतले; राहूल म्हणटात, भारताच्या आवाजा खातीर लढटां
नवी दिल्ली : भारतीय राजकी इतिहासांत हालींच्या वर्सांनी लालूप्रसाद यादव हांचे फाटल्यान एका व्हडल्या फुडाऱ्याचेर संकश्ट आयलां. काल दनपरां अडेजांक काँग्रेस फुडारी राहूल गांधी हांचें संसदेचें वांगडीपद रद्द केलां. ते वायनाड- केरळाचे खासदार आशिल्ले. लोकसभा सचिवालयान एक पत्र जारी करून हे विशीं म्हायती दिली. 2019 वर्सा कर्नाटकांतले रॅलींत राहूल हांणी मोदी आडनांवाचेर टिका करतना सगल्या चोरांचें नांव मोदीच कित्याक? अशें म्हणिल्लें. आतां चड करून राहूल हांकां आठ वर्सां खासदारकी सोडची पडटली. कारण दोशी लोकप्रतिनिधीक वेंचणूक लढोवपाक बंदी आसा. कालच्या निर्णयाक लागून राजकी मळाचेर खवदळ पडला. विरोधकांनी आंदोलन सुरू केलां, तर सरकार समर्थकांनी आनंदोत्सव.
ह्या मानहानी प्रकरणांत सुरत जिल्हो न्यायालयान बिरेस्तारा दनपरां राहूल गांधी हांकां 2 वर्सां बंदखणीची ख्यास्त दिल्ली. मात तांकां रोखडोच जामिनूय मंजूर केल्लो. मजगतीं, राहूल हांणी ट्विट केलां की हांव भारताच्या आवाजा खातीर लढटां. हांव कितेंय सोंसपाक तयार आसां. राहूल गांधी हे 8 लाख मतांनी वेंचून आयल्यात. इतल्या मतांनी अजून कोण वेंचून येवंक ना, अशें जाणकारांचें मत.
कायदे पंडितांच्या मतान, लोकसभा सचिवालयान राहूल गांधी हांची वायनाड संसदीय जागो रिकामी आशिल्ल्याचें जाहीर केलां. वेंचणूक आयोग थंय वेंचणुकेची घोशणा करपाक शकता. राहूल हांकां दिल्लींतलो सरकारी बंगलो रिकामी करपाचो आदेश भायर सरूं येता. जर वयल्या न्यायालयांनी हो निकाल कायम दवरलो जाल्यार, फुडलीं 8 वर्सां राहूलाक वेंचणूक लढोवपाक मेळची ना. कायद्या प्रमाण, दोन वर्सांची ख्यास्त पूर्ण करतकूच ते 6 वर्सां खातीर अपात्र थारतले.
काँग्रेसीचो निर्णय
सुरत न्यायालयाच्या निर्णयाक राहूल हांचो पंगड उच्च न्यायालयांत आव्हान दितलो. थंय अपील स्विकारूंक ना जाल्यार सर्वोच्च न्यायालयांत अपील करतले. सुरत न्यायालयाच्या निर्णयाक अपील करपाक 30 दिसांचो वेळ मेळ्ळा. पूण आयज अपील करूंक नासलें. फक्त राष्ट्रपती वेंचणूक आयोगा कडेन चर्चा करून खासदाराक अपात्र थारावपाक शकतात, असो दावो करून काँग्रेसीन हे कारवायेच्या कायदेशीर बाबींचेर प्रस्न उबो केला. मजगतीं, काँग्रेसीन देश पांवड्यार जनआंदोलन सुरू करपाचो निर्णय घेतला.
मानेस्तांच्यो प्रतिक्रिया
केंद्रीय मंत्री अनुराग ठाकूर : नॅशनल हेराल्डाच्या भ्रश्टाचार प्रकरणांत राहुल गांधी जामिनाचेर भायर आसात. तांकां संसदेंत सत्या पसून पयस पळपाची संवय आसा. म्हाका दिसता, ते स्वताक संसद, कायदो आनी देशा परस श्रेश्ठ समजतात. गांधी कुटुंब कितेंय करपाक शकता, अशे तांकां दिसता.
काँग्रेस अध्यक्ष मल्लिकार्जुन खरगे : भाजपान राहूल हांकां अपात्र थारावपाक सगले उपाय, पद्दती वापरल्यो. जे खरे उलयतात, तें भाजपाक आवडनात. पूण आमी खरें उलयत रावतले. राहूल हांचें विधान खंयच्याच समाजा कडेन संबंदीत ना. जे लोक (ललीत मोदी, निरव मोदी, विजय मल्ल्या) पयशे घेवन देशा भायर पळून गेले ते मागास समाजांतले आसले?
काँग्रेसीचे सचीव जयराम रमेश : आमी कायदेशीर आनी राजकी मार्गान लढटले. भियेवंचे नात, ओगी बसचे नात. प्रधानमंत्र्यांच्या अदानी म्हामेगा घोटाळ्यांत जेपीसी बदला राहूल हांकां अपात्र थारायल्यात. भारतीय लोकशाय ओम शांती.
कोण अपात्र थारले
लालू यादव (गोरवां खावड), रशीद मसूद (एमबीबीएस सीट भानगड), अशोक चंदेल (जल्मठेप मेळिल्ले खातीर), कुलदीप सेंगर (जल्मठेप मेळटकच), अब्दुल्ला आझम, आझम खान (आदले एक प्रकरण)
राहूल हांणी अध्यादेश पिंजिल्लो
11 जुलय 2013 दिसा सर्वोच्च न्यायालयान निकाल दिल्लो- सकयल्या न्यायालयान दोशी थारायलो जाल्यार खासदार, आमदार अपात्र थारतलो. तांकां वेंचणूक लढोवपाक मेळची ना. तेन्ना गोरवां खावड भानगडीचो निकाल लागपाचो आशिल्लो. लालुप्रसाद हांचेर त्या निकालाचो परिणाम जावपाचो. आरजेडी तेन्ना मनमोहन सिंग सरकारांत आशिल्ली. अशे स्थितींत सरकारान न्यायालयाच्या निर्णया आड अध्यादेश हाडिल्लो. तो मंजूर जाल्लो जाल्यार सर्वोच्च न्यायालयाचो निकाल बाद थारपाचो. 24 सप्टेंबर 2013 दिसा अध्यादेशाचेर पत्रकार परिशद चलताली. इतल्यान राहूल गांधी थंय पावले आनी तांणी हो अध्यादेश रद्दी आसा. तो पिंजून भायर मारचो. तांणी स्वता ताची प्रत पिंजली. उपरांत हो अध्यादेश रद्द जालो. तो मंजूर जाल्लो जाल्यार राहूल गांधी हांची खासदारकी आयज वांचपाची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
