भांगरभूंय | प्रतिनिधी
दुसरे वळेरेंत दोनूय उमेदवार जातले जाहीर: पाटकार
पणजी: लोकसभा वेंचणुके खातीर काँग्रेसीन शुक्रारा 39 उमेदवारांची पयली वळेरी जाहीर केली. पूण हे वळेरेंत गोंयच्या उमेदवारांचो आस्पाव केल्लो ना. गोंयचे उमेदवार दोनूच दिसांत येवपी दुसरे वळेरेंतल्यान जाहीर जातले अशी म्हायती काँग्रेस प्रदेशाध्यक्ष अमीत पाटकार हांणी दिली.
काँग्रेसीचे पयले वळेरेंत दिग्गज फुडार्यांच्या नांवाचो आस्पाव आसा. आदले अध्यक्ष राहूल गांधी वायनाड, भूपेश बघेल राजनांदगाव, शशी थरुर तिरुअनंतपुरमांतल्यान वेंचणूक लढयतले. काँग्रेसीन उत्तर गोंया खातीर आदले केंद्रीय मंत्री अॅड. रमाकांत खलप आनी सरचिटणीस विजय भिके हांची, जाल्यार दक्षीण गोंयच्यान सद्याचे खासदार फ्रान्सीस सार्दीन, आदले प्रदेशाध्यक्ष गिरीश चोडणकार आनी सरचिटणीस विरियातो फर्नांडीस हांचीं नांवां दिल्यांत. ह्या वेळार लोकसभे खातीर काँग्रेस रोखडींच नांवां जाहीर करून प्रचाराचो नाल्ल फोडटली अशें काँग्रेसीच्या ज्येश्ठ फुडाऱ्यान सांगलें. पूण अजून उमेदवारी जाहीर केल्ली ना.
मजगतीं, भाजपान उत्तर गोंयची उमेदवारी परतून केंद्रीय मंत्री श्रीपाद नायक हांकां दिले उपरांत काँग्रेसी कडल्यान उत्तर गोंयचो उमेदवार जाहीर जावपाची शक्यताय आशिल्ली. पूण भाजपांत दक्षीण गोंयच्या उमेदवारी वयल्यान गोंदळ वाडिल्ल्यान आनी थंयचो उमेदवार जाहीर जावंक नाशिल्ल्यान काँग्रेसीन सादुरतायेच भुमिका घेवन दोनूय कडचे उमेदवार उसरां जाहीर करपाचो निर्णय घेतिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
