भांगरभूंय | प्रतिनिधी
-प्रदेशाध्यक्ष, विरोधी पक्ष फुडारी रावतले दिल्लींत बसकेक हजर
पणजी: काँग्रेसीचे लोकसभा वेंचणुकेंतले गोंयांतले दोनूय उमेदवार बुधवारा निश्चीत जातले. काँग्रेसीच्या वेंचणूक समितीची बसकां बुधवारा सांजे दिल्लींत जातली. हे बसकेक हजर रावपा खातीर प्रदेशाध्यक्ष अमीत पाटकार आनी विरोधी पक्षफुडारी युरी आलेमांव बुधवारा सकाळीं दिल्लींत दाखल जातले, अशी म्हायती काँग्रेसच्या सुत्रांनी दिली.
लोकसभा वेंचणुकेच्या रिंगणांत आशिल्ल्या सत्ताधारी भाजप आनी रिव्हॉल्युशनरी गोवन्सान (आरजीपी) दोनूय मतदारसंघांतले उमेदवार जाहीर केल्यात. पूण काँग्रेसीन अजून दोनूय मतदारसंघांतले उमेदवार जाहीर करूंक नात. भाजपा कडल्यान दक्षीण गोंयचो उमेदवार जाहीर जाले उपरांतूच दोनूूय उमेदवार जाहीर करपाचे काँग्रेसीन थारायिल्ले. अखेर भाजपान फाटल्या आयतारा दक्षीण गोंयची उमेदवारी नामनेचे उद्देजक श्रीनिवास धेंपो हांची घरकान्न पल्लवी धेंपो हांच्या नांवाची घोशणा केल्या. ताका लागून काँग्रेसीन उमेदवार जाहीर करपाचे प्रक्रियेक नेट दिल्लो आसून, बुधवारा रातीं मेरेन दोनूय उमेदवारांच्या नांवांची घोशणा जातली.
मजगतीं, हे खेपेचे लोकसभा वेंचणुकेंत भाजप, काँग्रेस आनी आरजीपी ह्या तीन पक्षांचे उमेदवार आशिल्ल्यान वेंचणूक रंगतदार जातली. काँग्रेसीक हे खेपे दोनूय सुवातो जिखपाचो विस्वास आसा. ताका लागुनूच भाजप आनी आरजीपीच्या उमेदवारांक हरोवप शक्य आसा, अशा उमेदवारांची चांचपणी काँग्रेसच्या फुडाऱ्यां कडल्यान सुरू आसा.
आरजीपीन कांय म्हयन्यां पयलीं उत्तर गोंयांतल्यान मनोज परब आनी दक्षीण गोंयांतल्यान रॉबर्ट परेरा हांकां उमेदवारी जाहीर करून प्रचाराक सुरवात केल्या. ते उपरांत भाजपान पयल्या वळेरेंतल्यान उत्तर गोंयची उमेदवारी केंद्रीय मंत्री श्रीपाद नायक हांकां सेगीत सवे खेपे जाहीर केल्या. पूण दक्षीण गोंयच्या उमेदवारीचो घुस्पागोंदळ जायते दीस कायम आशिल्लो. अखेर भाजपान आयतारा पल्लवी धेंपो हांकां उमेदवारी जाहीर करून पदाधिकारी आनी कार्यकर्त्यां मदलो दुबाव पयस केलो.
काँग्रेसीन उत्तर गोंयां खातीर आदले केंद्रीय कायदो मंत्री अॅड. रमाकांत खलप आनी सरचिटणीस विजय भिके हांची, जाल्यार दक्षीण गोंयांतल्यान सध्याचे खासदार फ्रांसीस सार्दीन, आदले प्रदेशाध्यक्ष गिरीश चोडणकार आनी सरचिटणीस विरियातो फर्नांडीस हांचीं नांवां वेंचणूक समिती कडेन धाडल्यांत. ह्या नांवांचेर विचार सुरू आसा, पूण वेंचणूक समितीन निमाणो निर्णय घेवंक ना. बुधवाराच ह्या नांवांचेर म्होर बसपाची शक्यताय आसा.
मजगतीं, उत्तर गोंयांत फाटल्या कांय दिसां पसून श्रीपाद नायक हांचे उमेदवारी वयल्यान कांय जाणांनी नाराजी उक्तायल्या. जाल्यार, दक्षीण गोंयांत भाजपान पयलेच खेपे महिला उमेदवार वेंचणूक रिंगणांत देंवयल्या. ताका लागून काँग्रेसीक हे खेपे लोकसभेच्यो दोनूय सुवातो जिखपाचो विस्वास आसा. तशेंच हे खेपे काँग्रेसीक आम आदमी पक्षाचीय (आप) साथ मेळ्ळ्या. ताचो अदीक फायदो दक्षीण गोंयच्या उमेदवाराक मेळपाची शक्यताय आसा. आपाचे दोनूय आमदार आनी मुखेल पदाधिकाऱ्यांक पुराय विस्वासांत घेवन दक्षीण गोंयचो उमेदवार निश्चीत करपाची प्रक्रिया सुरू केल्या. सध्या काँग्रेसीन ज्या इत्सूक उमेदवारांचीं नांवां दिल्लींत धाडल्यात, तांचे खेरीत हेर फुडाऱ्यांत भापाच्या उमेदवारांक हारोवपाची तांक आासा काय, हाचोय अभ्यास काँग्रेसच्या फुडाऱ्यांनी केला. हे विशींचो अहवाल प्रदेशाध्यक्ष अमीत पाटकार बुधवारा दिल्लींत जावपी केंद्रीय वेंचणूक समितीचे बसकेंत सादर करतले.
ते उपरांत रोखडीच गोंयच्या दोनूय उमेदवारांचीं नांवां जाहीर करतले, अशेंय सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
