भांगरभूंय | प्रतिनिधी
कश्यप बखलेचो नाबाद शेंकडो आनी वीर यादवाच्या अर्द शेंकड्याच्या नेटार चौगुले स्पोर्ट्स क्लबान साळगांवकार क्रिकेट क्लबाच्या पयल्या डावांतल्या 450 धांवड्यांक 3 बाद 216 अशा धांवड्यांनी प्रत्युत्तर दिलें. जीपीएल क्रिकेट सर्तींतली ही तीन दिसांची लडत सांगें क्रिकेट अकादमीच्या मैदानाचेर चालू आसा.
आयज हे लडतीचो आयज निमाणो दीस आसा. पयल्या डावांत आघाडी कडेन आतां लक्ष आसा. चौगुले खातीर आघाडी मेळोवपा खातीर आनीक 235 धांवड्यांची गरज आसा.
कश्यपान 169 बॉलांनी नाबाद 110 धांवड्यो केल्यो. हातूंत 16 सक्यांचो आस्पाव आसा. जाल्यार वीर यादवान 118 बॉलांनी 55 धांवड्यो केल्यो. ताणें सात चवके आनी एक सको मारलो.
ते पयलीं 4 बाद 286 धांवड्या वयल्यान मुखार खेळपाक सुरवात करपी साळगांवकार क्रिकेट क्लबान आपल्या डावांत आनीक 164 धांवड्यांची भर घाली. ताचो मुखेली दीपराज गांवकारान 135 बॉलांनी 20 चवक्यांचे आनी तीन सक्यांचे मजतीन 162 धांवड्यो केल्यो. चौगुले वतीन सचिन मिश्रान चार, मोहित रेडकारान तीन आनी जगदीश पाटीलान दोन विकेटी घेतल्यो.
चौगुले क्लबाच्या पयल्या डावाची सुरवात बरी जाली ना. शिवम आमोणकार आनी दर्पण पागी हांकां खातें लेगीत उगडपाक जमलें ना. ते उपरांत वीर यादव आनी कश्यप बखले हांणी तिसरे विकेटी खातीर 121 धांवड्यांची भागिदारी केली. वीर यादव बाद जाल्या उपरांत बखले आनी समर दुभाषी हांणी चवथे विकेटी खातीर नाबाद 86 धांवड्यांची भागिदारी केली.
साळगांवकारा वतीन बिजेश प्रभुदेसायान दोन, यश कसवणकारान एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
