भांगरभूंय | प्रतिनिधी
खबरां संस्था मंगळुरू
कोंकणी कवी, वावुरपी आनी कविता ट्रस्टाचे संस्थापक मेलवीन रॉड्रिगीस साहित्य अकादेमीच्या कोंकणी सल्लागार मंडळाचे निमंत्रक म्हणून वेंचून आयल्यात. आयज नवी दिल्लींत अकादेमीची बसका जाली, त्या वेळार वेगवेगळ्या भाशांतले नव्यान वेंचून आयिल्ले 99 वांगडी हाजीर आशिल्ले. साहित्य अकादेमीच्या इतिहासांत कोंकणी सल्लागार मंडळाचें फुडारपण गोंयां भायले व्यक्तीक मेळपाची ही पयलीच खेप. मेलवीन फुडल्या पांच वर्सां खातीर साहित्य अकादेमीच्या सल्लागार मंडळाचे वांगडी आसतले. मजगतीं, हरियाणाचे माधव कौशिक साहित्य अकादेमीचे अध्यक्ष आनी डॉ कुसुम शर्मा (दिल्ली) उपाध्यक्ष म्हणून वेंचून आयल्यात.
वेवसाय वेवस्थापनांत पदवीधर आनी समाजशास्त्रांत पदव्युत्तर मेळिल्ले मेलवीन डायजी वर्ल्ड मिडिया प्रायव्हेट लिमिटेडांत संचलन संचालक म्हूण काम करतात. आखाती देशांनी 15 वर्सां ऑलिटी अॅश्युरन्स ऑडिटर म्हणून तांणी काम केलां. कविता ट्रस्ट हे संस्थेचे ते संस्थापक. तांणी ट्रस्टाच्यो 220 परस चड कार्यावळी घडोवन हाडल्यात आनी आयज मेरेन 34 पुस्तकां उजवाडाक हाडल्यात.
मेलवीन हांकां जायते पुरस्कार फावो जाल्यात. तातूंत संदेश साहित्य पुरस्कार (2021), एमसीए दोहा कतारचो कला पुरस्कार (2019), दायजी दुबय साहित्य पुरस्कार (2016), श्रीमती एस. विमला वी पै विश्व कोंकणी उत्कृश्ट कोंकणी कविता पुस्तक पुरस्कार (2016)- काव्यसंग्रह ‘देवी निंकासी’, साहित्य अकादमी पुरस्कार (2011) – काव्यसंग्रह ‘प्रकृतिचो पास’, डॉ पै फावंडेशन ‘उत्तम कोंकणी पुस्तक पुरस्कार – 2009’ खातीर – पुस्तक ‘प्रकृतीचो पास’, कर्नाटक कोंकणी साहित्य अकादेमीक साहित्याचो मान पुरस्कार – 2006, कोंकणी कुट्टम बहरीन पुरस्कार (2006).
मेलवीन 2019 वर्सा काणकोणां जाल्ल्या 24व्या अखील भारतीय कोंकणी साहित्य संमेलनाचे अध्यक्ष आशिल्ले आनी अ. भा. कोंकणी परिशदेचे उपाध्यक्ष आसात. कोंकणी भास आनी सांस्कृतीक फावंडेशनाचेय ते ट्रस्टी आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
